Tele taufa’asesē ‘i tupe – Kiwibank

‘Ua mōlimauina lava le fa’atuputupula’ia pea ‘o le tele ‘o taufa’asesē ‘o lo’o maumau ai tupe, ma ‘e ‘auala ‘ese’ese atu ‘i tagata ia faiga taufa’avalea.  ‘O se tasi ‘o fa’ata’ita’iga, ‘o taufa’asesē ia ‘e faia ‘i ‘inivesi.  ‘Ua fa’alauiloa ai ‘e le Pūlēga ‘o Māketi tau tupe le lisi ‘o pisinisi po’o tagata ta’ito’atasi ‘e tatau ‘ona nofo silafia ‘i ai tagata ‘uma pe ‘ā fai ‘ua fa’amoemoe ‘e ‘inivesi ni tupe.  ‘E ‘i ai se taufa’asesē ‘o lo’o fa’atūtū ‘i tagata ‘e iai a lātou teugātupe ‘i le Kiwibank, ‘o lo’o sa’ili le pasene ‘o Teugā tupe fa’avaitaimi. 

Ma ‘ā fai ‘ae ‘o’omi sesē ‘e tagata ma tu’u ai a lātou fa’amaumauga ‘i ni ‘upegatafā’ilagi pepelo, ‘ona tulituliloa loa lea ‘e le ‘au taufa’avalea ‘e ala ‘i le vili ‘i le telefoni ma fa’atauānau, ma i’u ai ‘ina mao ‘ave ‘i ai ma a lātou tupe.  ‘E fa’apēnā ‘i taufa’asesē ‘i tupe toe maua mai ‘i le ‘Ōfisa ‘o Lāfoga (IR tax refund).  ‘E tele ‘ina maua ‘e tagata ni ‘īmeli ‘e fa’afōliga mai ‘o ni ‘īmeli ‘e fa’apea ‘o lo’o taofia le tupe ‘a le tagata, ‘ona ‘e toe mo’omia nisi fa’amaoniga.  ‘Ona lafo fa’atasi mai lea ma se ‘upegatafā’ilagi ‘e tatala ‘e le tagata ‘e tu’u atu ai le fa’amaoniga, peita’i, ‘o se mailei ‘e maua ai fa’amaumauga ‘o le tagata ma āfāina ai ana teugātupe. 

‘O isi taufa’asesē ‘e ‘auala atu ‘i se tusitusiga ‘i telefoni fe’avea’i (text), ‘o le Kiwibank po’o le NZ Post, ‘o telefoni ‘e vala’au atu ai ‘i le tagata, ‘o fa’asalalauga fa’apisinisi ‘a le Google.  ‘O le fautuaga mai le faletupe ‘o le Kiwibank ‘i tagata ‘o lo’o faia ai a lātou teugātupe, ‘ina ‘ia vala’au le nūmera 0800 113 355 pe ‘ā fai ‘e lagona ‘ua mao ‘i le taufa’asesē, ‘ā lagona fo’i ‘ua maua se īmeli taufa’asesē, toe lafo lea īmeli (forward) ‘i le suspicious.email@kiwibank.co.nz. Afai ‘o se text, toe lafo aga’i i le numera 7726.

ATA: Consumer NZ.