Tele tamaiti 5 tausaga ‘e maualalo tomai ‘o le tautala

‘E to’atele tele tamaiti ‘e ta’i lima tausaga ‘e ‘āmata ane ‘i ā’oga tūlaga lua, ‘e lē lelei le tautatala ‘e pei ‘ona fa’aalia ‘e faiā’oga, ma ‘ua lātou tu’ua’ia ‘e faiā’oga le Koviti-19 ma le tele tele ‘o le taimi ‘e fa’asasaga ai ‘i masini fa’atēkonolosi. 

‘Ua lipotia ‘e faiā’oga ‘o tamaiti fou ma faiā’oga ‘o ā’oa’oga ‘āmata, ‘ua to’atele lava tamaiti ‘ua o lātou molimauina le lē lelei ‘o le tautatala, ‘e tusa ai ma se lipoti ‘a le Ofisa ‘e faia iloilōga mō Ā’oga ‘ua fa’alauiloaina ‘i le asō.  ‘E sili atu ma le kuata ‘o faiā’oga ‘i ā’oga ‘i pitonu’u ‘e maualalalo tamāo’āiga, ‘ua o lātou fa’aalia, ‘o le tele lava ‘o a lātou tamaiti ā’oga, ‘e i lalo ifo la lātou tautatala, mai le tūlaga ‘e tatau ‘ona iai, fa’atusatusa ‘i le nā’o le 3 pasene ‘o tamaiti fou ‘i ā’oga ‘i pitonu’u ‘e maualuluga tamāo’āiga.  Na fa’aalia ‘e nisi faiā’oga, ‘e iai nisi tamaiti ‘e lē mafai ‘ona tautala ‘ātoa ‘i se fuai’upu ‘e sili atu ma le fā pe lima ni ‘upu, tele taimi ‘e va’ava’ai pe matamata ai ‘i masini fa’atēkonolosi ma la’itiiti le taimi ‘e faitau ai ni tusi.  Matuā lē iloa le fa’atulagaga ‘o le gagana, soānauna ma le kalama faigōfie.  ‘O nisi tamaiti ta’i 6 tausaga, ‘a tautatala, ‘ua fa’apea, “A’u alu faleui”, ‘ae ‘ua lē mafai ‘ona tautatala, ‘ou te alu ‘i le faleui’, ‘e tusa ai ma se fa’amatalaga ‘a se tasi ‘o faiā’oga.  Na tā’ua ‘e se tasi faiā’oga, talu mai ‘ona faiā’oga ‘i le 24 tausaga talu ai, ‘e le’i va’ai muamua lava ‘i se tūlaga maualalo fa’apea ‘ua o’o ‘i ai le gagana tautala.

Link to RNZ (Article) translated by Savelina Kasiano: https://www.rnz.co.nz/news/national/525811/more-5-year-olds-starting-school-with-low-speaking-skills-teachers

ATA: Sāmoa Capital Radio (file).