Tele pisinisi tāpuni ‘ona ‘o fa’aletonu tau tupe ‘i Niu Sila

‘E tele pisinisi ‘i Niu Sila nei, ‘ua tāpuni ‘ātoa ma isi ‘ua feagai ma le tele ‘o faigatā, ‘ona ‘o le tau lēai ‘o ni tagata fa’atau ma le taugatā ‘o le fa’agaioia ‘o pisinisi ‘i totogi ‘o tagata faigaāuega, ‘ae fa’apea ‘inisiua ma le tau ‘o le fela’ua’iga ‘o ‘oloa ‘i va’alele ma va’aalalo ‘ātoa ma fela’ua’iga ‘i luga ‘o le lau’ele’ele.

‘Ua iloa fo’i ‘i fa’amaumauga ‘āloa’ia le pa’ū ‘i le 0.6 pasene ‘o le fa’aaogāina ‘o pepa tala tupe po’o bank cards ‘i le māsina ‘o Iuni, ‘a’o le tau aofa’i ‘o fefa’ataua’iga ‘uma na pa’ū le 4.9 pasene pe ‘ā fa’atusa ‘i le tausaga ‘ua mavae.

‘I se su’esu’ega na faia ‘a le fa’alāpotopotoga ‘o le Retail NZ ‘o ona sui ‘āuai, na iloa ai ‘o le sili atu ‘i le 70 pasene ‘o sui ‘āuai, ‘e le’i maua le aofa’i ‘o ā lātou fa’atau sā fuafuaina mō le kuata lona lua ‘o lenei tausaga.

Na tā’ua ai ‘e le fa’atonu ‘o le Retail NZ, o Carolyn Young, ‘o le uiga moni ‘o lea tūlaga, ‘e tele pisinisi ma kamupanī ‘e le’i mafai ‘ona maua ni tupe mamā po’o ni polōfiti ‘e tau fa’afetaui ai tupe alu ‘iā lātou gāluega fai.

ATA: RNZ.