Tele fale ‘o le ‘ā fausia ‘i Uēligitone ‘i gāluega tetele ‘o le ‘ā fausia fa’anatinati ‘e le faigāmālō ‘i lana tūlāfono taufa’aofi

‘E ono tele ni fale fou ‘o le ‘ā fausia ‘i Uēligitone, pe ‘ā o’o ‘ina fa’atino le sūiga ‘o le Tūlafono ‘e le faigāmālō so’ofa’atasi, ‘e fa’anatinati ma fa’avavevave ai ‘ona pāsia gāluega tetele ma fa’atino loa, ‘e ui ‘ina ‘e tele ni gāluega tetele ‘o lo’o fesiligia ma tele ‘i ai fa’a’upuga ‘a tagata.

‘O le Aso Sā lea na fa’ailoa mai ai ‘e le faigāmālō, ‘e fa’apea ‘e 149 le aofa’iga ‘o ni gāluega tetele ‘ua filifilia, ‘e aofia ‘i le pili lenei, lea ‘ua fa’amoemoe ‘e o’o ‘i luma ‘o le Komiti Filifilia mō matā’upu tau ‘i le si’osi’omaga, ‘i le māsina nei.

‘O le fausia ‘o ni fale fou ‘o se tasi lea ‘o ātīna’e ‘autū mō le laumua ‘i Uēligitone ma ona nu’u tuā’oi, mā ‘e ono le aofa’iga ‘o ni gāluega tetele tau fale, ‘o le ‘ā tatau ‘ona maua ai le sili atu ‘i le 8,000 ‘o fale fou ‘e fausia ai ‘i le Kapiti Coast fa’apea ma Hutt Valley, pe ‘ā fai ‘o le ‘ā pāsia ma fa’atinoina loa.

‘O isi gāluega tetele ‘o lo’o aofia ‘i le lisi lenei ‘a le Mālō, ‘e iai le fausia lea ‘o se tunnel fou, lea ‘ua fa’aigoaina ‘o le Long Tunnel, mā ‘o lo’o faia nei ‘i ai su’esu’ega ‘a le Pūlega ‘o ‘Auala Tetele, ‘ātoa ai ma le sūia ‘o le taligalu ‘i le itū ‘i saute ‘o le malaeva’alele ‘i Uēligitone.

‘O isi ātina’e tetele ‘o lo’o aofia ‘i le polokalame ‘a le Mālō, ‘e pei ‘ona fa’ailoa mai, ‘e iai le gāluega tele, ‘o le Plimmerton Farm ‘i Porirua ‘ātoa ma isi fale ‘e fia fausia ‘i le ātīna’e ‘e fa’aigoaina ‘o le Silverstream Forest ‘i Upper Hutt.

‘O Porirua fo’i ‘o lo’o fuafuaina ai le fausia ‘o ni fale fou ‘e 3,300 le aofa’iga ‘i lalo lava ‘o le pili lenei ‘a le faigāmālō so’ofa’atasi.

Link to RNZ (Article) translated by Lauano Ati Ilaoa: https://www.rnz.co.nz/news/political/530075/fast-track-approvals-wellington-housing-developments-silverstream-forest-and-plimmerton-farm-given-green-light

ATA: Wellington / RNZ.