Tele atu tamaiti Pasefika ma Māori ‘i falema’i ‘ona ‘o le Fiva Rumatika

‘E silia ma le fa’aselau le tele atu ‘o taimi ‘e fa’atā’o’otolia ai tamaiti Pasefika ‘i falema’i ‘ona ‘o le ogaoga ‘o a’afiaga mai le fiva rumatika ‘e tusa ai ma se lipoti ‘o le Cure Kids’ 2023 State of Child Health Report.  Sa māua ‘i lea lipoti, ‘o tamaiti Pasefika, sa fa’aselau sefululima le telē ‘o le avanoa ‘e fa’atā’o’otolia ai ‘i falema’i ‘o le fiva rumatika, ‘a’o Māori ‘e fa’afāsefuluono taimi, fa’atusatusa ‘i isi tamaiti ‘uma ‘i totonu ‘o Aotearoa. 

Sa fa’amauina fo’i, le maualuga atu ‘o taimi ‘e taofia ai tamaiti Pasefika ‘i falema’i ‘ona ‘o ma’i ‘e a’afia ai o lātou ālā’ea mānava pito ‘i ai tamaiti Māori ‘ona fa’ato’ā soso’o atu ai lea ma tamaiti mai Sasa’e Tūtotonu, ‘Amerika Latina po’o ‘Aferika.  ‘Ua fa’aalia fo’i ‘i le sā’ili’iliga, ‘e 61 pasene ‘o tamaiti ‘e taofia ‘i falema’i mo tulaga ogaoga muamua ‘o le fiva rumatika ‘i le tausaga e 2022, ‘o tamaiti ‘e nonofo ‘i nu’u po’o vāega ‘i pito maualalo ma fa’alētonu le tamao’āiga.  ‘E lima ni vāega na fa’ailoa ‘i le lipoti a le Cure Kids sa ‘ave ‘i ai le fa’amuamua ‘e fa’atatau ‘i tūlaga ‘o lo’o taofia ai tamaiti ‘i falema’i, ‘e aofia ai a’afiaga ‘o ālā’ea mānava, ‘o le fiva rumatika ma ma’i ‘o le fatu, ma’i ‘o lo’o a’afia ai le pa’u, ma’i ‘o nifo ma a’afiaga ‘o le mafaufau. 

Na fa’aalia ‘e le Minisitā ‘o le Soifua Mālōlōina ‘o le Minisitā fo’i mō Tagata Pasefika, Dr Shane Reti, ‘o le lipoti, ‘o se fa’aosofiaga na māfua mai ‘i le polokalame mō fale ‘e soifua mālōlōina lelei ai tagata Pasefika lea sa fa’asilasila ‘i le masina talu ai.  ‘O lo’o fa’atupeina ‘i le 4.02 miliona tālā ‘i le isi tausaga ‘o lumana’i, ma ‘o lo’o fa’alautele ai fo’i le polokalame ‘o le Healty Homes Initiative ma le Warmer Kiwi Homes ‘e toe fa’aleleia ai fale ‘e 600 mō Pasefika.

Link to RNZ (Article) translated by Savelina Kasiano: https://www.rnz.co.nz/international/pacific-news/528323/pacific-maori-children-suffer-staggering-rates-of-rheumatic-fever-hospitalisation-report

Original Article by PMN – Aui’a Vaimaila Leatinu’u

ATA: Ministry of Health and Health Promotion Agency National Rheumatic Fever Campaign.