Tele atu le nunumi ‘i suiga ‘o tūlāfono ‘i le saogalēmū ‘i fale faigāluega

Na fa’aalia ‘e le Fa’alāpotopotoga ‘a Niu Sila mō le Pūlega ‘o le Saogalēmū, ‘o le ‘ā a’afia le tamāo’āiga ‘o le atunu’u fa’apea ai ma le saogalēmū ‘o tagata faigāluega ‘ona ‘o fuafuaga ‘ua toe fa’afo’i ai ‘i tua tu’utu’uga mō le soifua mālōlōina ma le saogalēmū ‘i gāluega.

‘O le Tūlāfono Taufa’aofi mō le Saogalēmū ‘i Gāluega (Safety at Work Amendment Bill) ‘a le Minisitā mō Matā’upu tau ‘i Gāluega ma le Saogalēmū, Brooke Van Velden, ‘o le ‘ā tu’usaunoa ai pisinisi ‘e i lalo ifo ‘o le ta’i 20 a lātou tagata faigāluega mai o lātou tiute fa’aletūlāfono ‘e tatau ai ‘ona lātou pulea ma va’aia ni tūlaga lamatia ‘e lē ni vāega ōgaoga mō le saogalēmū.  ‘O le fa’amoemoega ‘o le pili, ‘ina ‘ia fa’aitiitia ai le nūmera ‘o tagata māliliu ma mānunu’a, fa’apea fo’i ma tau mō le tausisia ‘o le tūlāfono, ‘e ala lea ‘i le māta’itū ‘o ni tūlaga ogaoga ma fa’aitiitia ai fo’i le nunumi. 

‘O ananafi lea na fa’alauiloa ai le rīpoti ‘a se komiti fa’apālemene ‘e uiga i le suiga ‘o le tūlāfono pei ‘ona fuafuaina. 

Na saunoa Mike Cosman ‘o le ta’ita’ifono ‘o le Institute of Safety Management ‘i luga ‘o le Radio NZ, ‘e o’o atu ‘i le 97 pasene ‘o pisinisi ‘i le atunu’u, ‘o tama’i pisinisi. 

Na saunoa Cosman, ‘e lē’o tama’i pisinisi ‘uma ‘o le ‘ā fa’apea ane, ‘o le ‘ā o lātou lē toe tu’uina atu ni se’evae po’o tōtinilima ‘e fa’aaogā mō le puipuiga ma le saogalēmū, pe fa’apea fo’i, ‘o le ‘ā o lātou lē toe a’oa’oina pe va’aia lelei ‘i lātou ‘ona ‘o gāluega ia lātou te faia, ‘e lē ‘o aofia ‘i le lisi ‘o gāluega ‘e pito lamatia ai le saogalēmū, peita’i ‘o se fe’au lea ‘ua momoli mai ai, ‘o le ola mālōlōina ma le saogalēmū, ‘e mō na’o ni fa’alavelave mātuiā ‘ae lē ‘o ni mea ‘e āfua ai ni manu’aga ‘i aso ta’itasi.  Na saunoa Cosman, ‘o suiga ia ‘ua fuafuaina, ‘e lēai ma se fofō ‘o maua ai mō le tūlaga fa’alētonu ‘o le va’aiga ‘o le soifua mālōlōina ma saogalēmū ‘i gāluega, pe ‘ā fa’atusa ‘iā ‘Ausetālia ma Peretānia tele.

Na ia saunoa fo’i, ‘ua 46 tausaga ‘o aofia ‘i totonu ‘o le saofa’iga mō le soifua mālōlōina ma le saogalēmū ‘i galuega, ‘e ala ‘i le ‘avea ma pule fa’atonu, ‘o se fai pōlisi, ‘o se konesale ma se tasi ‘o faitōfā ‘i ia matā’upu, ‘ae ‘o lo’o ia taufa’avasegaina le uiga ‘o nisi ‘o tusitusiga ‘o lo’o folasiaina mai ‘i lea pili fou.

Link to RNZ (Article) by Checkpoint: https://www.rnz.co.nz/news/political/598371/workplace-safety-changes-would-create-more-confusion-health-and-safety-expert

CAPTION: ACT Party MP Brooke Van Velden claims the bill offers common sense changes that increase certainty, ease compliance costs and improve safety.
IMAGE/ATA: Mark Papali’i / RNZ