Tē’ena ‘e le Mālō fautuaga aloā’ia ‘i le fa’aitiitia ‘o le tūlaga mativa ‘e āfaina ai tamaiti ‘i Niu Sila
‘E lē talia ‘e le faigāmālō so’ofa’atasi ‘o iai nei ‘a Niu Sila, le fautuaga aloā’ia ‘a le Matāgāluega ‘o Tupe, ‘e mana’omia le tusa ‘ole $3 Piliona Tālā ‘i le tausaga, ‘ina ‘ia ‘ausia ai le sini ‘i le fa’aitiitia lea ‘o le tūlaga mativa ‘o lo’o āfaina ai tamaiti ‘i totonu ‘o le atunu’u.
‘O se fa’aāliga mai le Minisita mō le Fa’aitiitia ‘o le Tūlaga Mativa ‘o Tamaiti, ‘o Louise Upston, na ia tā’ua ai ‘i se talanoaga mā le Leitiō Niu Sila, ‘e ‘ese le ‘auala lea ‘e taumafai iai le lātou faigāmālō mai le fuafuaga ‘a le faigāmālō sā iai ‘a le Labour.
Sā tā’ua ai ‘e le tama’ita’i Minisitā, ‘o lo’o mana’o le mālō so’ofa’atasi ‘e fa’aleleia tamāo’aiga, mā ‘au’aunaga tau ‘i le soifua mālōlōina ma a’oā’oga, mā ‘ia fa’ato’atele tagata ‘e faigāluega mai ‘aiga ta’itasi, ‘ina ‘ia fa’aitiitia ai le tūlaga mativa lea ‘o lo’o āfaina ai tamaiti ‘i le fa’a’upuga fa’aperetānia, ‘o le child poverty.
Na tā’ua fo’i ‘e Louise Upston, ‘e manatu le faigāmālō ‘o lo’o tū nei ‘i le foe, ‘e sili atu lea nai lō le fa’alagolago ‘i penefiti ma le fa’apa’ūina ‘o le fua ‘o lāfoga totogi, ‘e pei ‘ona sā iai le fuafuaga ‘a le Labour ‘i le tau togafitia ‘o lenei fa’afitauli.
‘O le faigāmālō ‘a le Labour, na ō lātou fa’atūla’i mai ai se fuafuaga fa’ata’atia, ‘e tatau ‘ona o’o atu ‘i le vaeluāga ‘o le tausaga ‘e 2028, ‘ua pa’ū ifo mai le 13.3 pāsene ‘i le 6 pāsene le āofa’i ‘o tamaiti ‘o feagai ma āfaina ‘ona ‘o le mativa ma le lē tagolima ‘o ō lātou ‘aiga.
‘E lua ni fautuaga aloā’ia sā tu’uina atu ‘i le tama’ita’i Minisitā ‘o Louise Upston, ‘e le Matāgāluega ‘o le Tupe ‘e tusa ai ‘o lenei matā’upu mā lō lātou talitonuga ‘e tatau ‘ona ‘ausia ai le fa’amoemoe lenei ‘i le tausaga ‘e 2028.
‘Ae peita’i, ‘ua fa’ailoa mai ‘e le Minisitā ‘i le ‘au tusitala, ‘e lē talitonu le faigāmālō ‘i lea fautuaga mai le ‘Ofisa ‘o Tupe, ‘ona ‘e manatu ‘o le ‘a ātili ai ‘ona fa’alagolago le to’atele ‘o ‘aiga ma tamaiti ‘i le penefiti ma fesoasoani mai le mālō.
Link to RNZ (Article) translated by Lauano Ati Ilaoa: https://www.rnz.co.nz/news/political/528762/louise-upston-rejects-official-advice-3b-a-year-needed-to-fix-child-poverty
ATA: Minister for Child Poverty Reduction Louise Upston / RNZ / Samuel Rillstone.