Taumau le Labour ‘e fa’amautū le māliliega ‘o totogi tutusa ‘i le Pāketi ‘o lumana’i nei

‘Ua folafola ‘e le Vāega Fa’a’upufai ‘a le Labour, ‘āfai ‘ae pale mai ‘i le faigāpālota, ‘o le ‘ā pāsia ‘i totonu ‘o aso muamua ‘e 100 talu ‘ona filifilia, le tūlāfono mō totogi tutusa (pay equity) mā ‘o le ‘ā aofia ‘i lana pāketi  muamua pei ‘ona fa’aopoopo atu ‘i ai la lātou so’o’upu mō matā’upu tau tupe, Pesetā Barbara Edmonds. 

Sā folasia ‘i le ‘āmataga ‘o le vaiaso nei, le Līpoti ‘o le Tamāo’āiga ma Tupe ‘a le Mālō ‘a’o leʻi faia le Faigāpālota mō le taimi muamua, talu mai le Tala Fa’atatau ‘Autū ‘o le Tupe ‘i le māsina ‘o Mē, ma sa fa’ailoa ai, ‘ua fa’aleleia le tūlaga ‘o tupe.  Peita’i, ‘o le lapata’iga ‘a le au fai tōfā ‘o le tamāo’āiga ma fa’alāpotopotoga ‘o pisinisi, ‘e iai ni lu’itau sili atu ‘ona ogaoga ‘o lo’o lalafi mai tua ‘o ia va’aiga lelei.

Na folafola ‘e Edmonds, ‘o le māliliega muamua mō totogi tutusa (pay equity) po’o le tatau lea ‘ona tutusa ma talafeagai ‘o totogi ‘o tagata faigāluega ‘o lo’o faia ni gāluega ‘e tutusa le tāua, ‘i lalo ‘o le tūlāfono pe ‘ā toe sui.  ‘O lona fa’anaunauga, ‘ina ‘ia fa’atino lea fuafuaga ‘i lana Pāketi muamua, mō le māliliega ‘auā le va’aiga ma le fesoasoani mō tagata faigāluega, ‘aemaise lava ‘ona ‘o le vāega lea ‘o lo’o naunau iuni ‘e tatau ‘ona fa’atino muamua.

Link to RNZ (Article): https://www.rnz.co.nz/news/politics/1653587/labour-commits-to-securing-first-pay-equity-deal-by-next-budget

IMAGE/ATA: RNZ / Nick Monro