Taugatā ‘inisiua ‘i Uēligitone nai lō ‘Aukilani

‘I le itū tau ‘inisiua; ‘e fa’aluaina le tau ‘o ‘inisiua ‘o fale ‘i totonu ‘o Uēligitone nai lō ‘Aukilani, ma ‘o lo’o manino mai lea tūlaga ‘i se līpoti ma fa’amaumauga ‘a le ‘upega ‘o feso’ota’iga tau ‘inisiua, ‘e tā’ua ‘o le Quashed.  ‘I totonu ‘o le tausaga lea na fa’ai’uina ‘iā Sētema, sā fa’amauina ai le tau aupito maoa’e mō ‘inisiua ‘i le tausaga ‘ātoa, ‘i le fua ‘evalesi ‘e $4467 ‘i totonu ‘o Uēligitone, fa’atusa lea ‘i le $2014 mō ‘Aukilani ma lona itūmālō.  ‘E lē gata ‘i le ‘inisiua ‘o fale, ‘ae fa’apea fo’i ‘ona maualuga le tau ‘o inisiua ‘o meāafale ‘i totonu ‘o le laumua nai lō ‘Aukilani.  Peitai lā, ‘e taugatā atu le ‘inisiua mō ta’avale ‘i Aukilani nai lō Uēligitone.

‘O ‘Aukilani na si’itia ai le 18 pasene ‘i le tau ‘o ‘inisiua mō ta’avale fa’atusa ‘i le tausaga ‘ua mavae, ‘ae 17 pasene na si’itia ai ‘inisiua ‘o fale, ‘ae 12 pasene na si’itia ai le ‘inisiua ‘o meāafale.  ‘O le fua ‘evalesi ‘o le tau, po’o premiums ‘o ‘inisiua mō fale māsani ‘ātoa ma meāafale ‘i Uēligitone ‘e tusa lea ma le $3733.24 fa’atusa lea ‘i le $2441.51 mō ‘Aukilani.  ‘Ae ‘o fale lāpopo’a ma tetelē atu, ‘e $5088.34 ‘i Uēligitone ‘ae $2822.58 sene ‘i ‘Aukilani.

 Link to RNZ (article) translated by Savelina Kasiano:https://www.rnz.co.nz/news/business/532505/house-insurance-costs-twice-as-much-in-wellington-as-in-auckland-data-shows

Ata: RNZ / Richard Tindiller