Tau fai mānana’o le Labour ma le National ‘e togafiti le taugatā ‘o mea’ai ‘i supamāketi

‘A’o vevela ai fa’atōsina mō le pālota tele ‘iā Nōvema, ‘a’o lea ‘ua aliali mai le tau’fai mānana’o ‘o le Labour ma le National ‘e faia se togafiti ‘i le fa’alētonu ‘o pūlega ‘o supamāketi ‘autū ‘e lua ia ‘e fa’afoeina le supply ‘o meataumafa ‘i totonu ‘o Niu Sila ‘i le taimi nei.

‘O le Aso Sā lea na fa’ailoa mai ai le pōlisi ‘a le Labour mō le faia ‘o se fuafuaga ‘i le vāega ‘o lo’o fa’atau ai ‘oloa si’i’ātoa po’o le wholesale ‘ina ‘ia maua ai se tauvaga talafeagai ma supamāketi ‘a le ‘aufaipisinisi ta’ito’atasi.

‘Ae ‘ua ‘uma ‘ona fa’ailoa mai muamua atu, le mana’o ‘o le National lātou, ‘ua tatau ‘ona vaeluaina le kamupanī ‘o le Foodstuffs, ‘ae ‘ese ai fo’i le pōlisi ‘a le pātī ‘a le Greens, lea na folafola mai ai le fa’avaeina lea ‘o se supamāketi ‘a le Mālō ‘e fa’aigoaina ‘o le Kiwimart.

Na fa’aalia ‘e le Labour, ‘ā fai ‘e tūla’i mai ‘i lātou ‘i le ta’ita’iga ‘o le Mālō, ‘o le ‘ā fa’amālosia kamupanī ‘a le Foodstuffs fa’apea ai ma le Woolworths, ‘ina ‘ia fa’a’ese’ese le fa’afoeina ‘o a lātou supamāketi ma ā lātou wholesale ‘o le fa’amoemoe ‘o lea pōlisi, ‘ina ‘ia maua ‘e le ‘au faipisinisi lāiti le avanoa mō ‘oloa ‘ia si’i’ātoa ma puipuia ai kamupanī ‘e ona ia wholesale mai le tāofia ‘o le fa’atauina atu ‘o ia ‘oloa ‘i le ‘au faipisinisi lāiti.

Na fa’aalia ai ‘e le ta’ita’i ‘o le Labour, ‘o Chris Hipkins, ‘e o’o lava ‘i le Warehouse, ‘o lo’o faigatā ‘ona lātou maua ‘oloa si’i’ātoa mai wholesale nei ‘e pūlea ‘e kamupanī ‘autū ia ‘e lua ‘o le Foodstuffs ma le Woolworths, ma ‘ua fa’amaonia ai ‘e tatau ‘ona faia se togafiti ‘i lenei tūlaga fa’alētonu, ‘o lo’o māfua ai le taugatā ‘o mea’ai mō le ‘au fa’atau.

‘E matuā lagolagoina ‘e le Greens lea fuafuaga, ‘ae tete’e mālosi ‘i ai le pātī ‘a le ACT.

‘O le lāgā ai ‘o lenei matā’upu ‘e ta’ita’i ‘o pātī tetele ‘i totonu ‘o le atunu’u, ‘o se tūlaga ‘ua fa’afiafiaina ai le fa’alāpotopotoga ‘o le Consumer NZ, ‘ona ‘o lea ‘ua se’e atu ai le matā’upu ‘i le sā’ilia ‘o se togafiti ‘i le fa’alētonu ‘o lo’o tūla’i mai, ‘ae lē ‘o le saga talanoaina pē moni ‘o iai se fa’alētonu.

Link to RNZ (Article): https://www.rnz.co.nz/news/politics_election-2026/1483158/supermarket-debate-shift-encouraging-as-labour-national-campaign-on-reform

IMAGE/ATA: RN / Sam Rillstone