Tatala le polōketi ‘o fale mō Pasefika ‘i Porirua – ‘o se suiga maoa’e

‘Ua fa’alauiloa ‘e le Central Pacific Collective (CPC) le tatalaga ‘o le polōketi ‘o fale ‘i Porirua ‘i Sasa’e, ‘i le asō, 31 ‘Oketopa, ma ‘o se ātina’e ‘o le ‘ā mafai ‘ona suia ai soifuaga ‘o le tele ‘o ‘āiga Pasefika ‘i totonu ‘o Niu Sila.  ‘O le taeao analeilā na patipatia ai ‘e ala ‘i se fa’apa’iaga ‘o le ‘ele’ele, ta’ita’ia ‘e le iwi po’o tagata Maori ‘e ana le fanua, le Ngāti Toa Rangatira, soso’o ai ma se sauniga ‘e suōina ai le palapala ‘i Castor Crescent Cannons Creek.  ‘E 300 le aofa’iga ‘o fale ‘o le ‘ā fauina ‘i lenei polōketi ‘e lē gata ‘e gafatia ‘ona totogi ‘e tagata Pasefika, ‘ae mafai ‘ona ofi ai ‘au’āiga ‘ona ‘o le ‘ā fauina ‘e fa’atatau ‘i mana’oga ‘o ‘āiga Pasefika. 

Na fa’aalia ‘e le ‘ōfisa sili ‘o le Central Pacific Collective, Fa’amatuāinu Tino Pereira, ‘o le polōketi ‘o le “Our Whare Our Fale”, ‘ua patipatia ai so’otaga lelei ‘a mafutaga ma tagata Pasefika, ‘o ā lātou tiute tau’ave ma taumauga ‘o le tasi ‘i le isi ‘e ala ‘i ‘au’āiga potopoto ma ō lātou so’otaga loloto.  ‘E silia ma le 60 pasene tagata ‘e alaala ‘i Cannons Creek, ‘o tagata Pasefika.  ‘E fa’aluaina le telē ‘o le avanoa ‘e ono nonofo ai ‘āiga ‘i Porirua ‘i Sasa’e ‘i fale ‘e susū ma sosolo ai le lega, nai lō isi ‘āiga ‘i Porirua.  ‘O le Tusigā Igoa ‘o le 2023, na fa’ailoa ai ‘i fa’amaumauga, ‘e lata ‘i le 70 pasene ‘o tagata ‘e alaala ‘i Cannons Creek, ‘e lē’o nonofo ‘i ni fale motu fa’atusatusa ‘i le 33 pasene ‘i isi vāega ‘o Porirua.  ‘O le pitonu’u ‘o Whitby, ‘e na’o le 16 pasene tagata ‘e le’o nonofo ‘i ni o lātou lava fale motu.

Link to RNZ (article) translated by Savelina Kasiano: 

Ata: SCR/Tufue Fiso