Tatala le “Le Lumana’i Siva Academy” ‘e le Miss Fa’afāfine Sāmoa Annie Kioa

‘Ua tatalaina se polōketi fou ‘e fa’atatau ‘i le ātina’ega ‘o tāleni ‘a tupulaga talavou, ‘ua fa’aigoaina lea polōketi ‘o Le Lumana’i. ‘O lea fa’amoemoe na fa’avaeina ‘e le Miss Fa’afafine a Samoa, Annie Kaio ma ‘o lo’o taula’i i le a’oa’oina ‘o tupulaga Sāmoa, ‘i o lātou tofi ma fa’alauiloa tū ma aga fa’aleaganu’u ma fa’afiafiaga, ‘e fa’amanatu ai o lātou fa’asinomaga. Le Lumana’i, ‘o lona uiga “O le Lumana’i”, na mamanuina ‘e fa’alauiloa ai lu’itau tūlaga ‘ese ‘o lo’o feagai ma fa’afāfine ta’ito’atasi ma fa’atupuina le mālamalama atili ‘i lo lātou sao tāua ‘i le sōsaiete Sāmoa. 

Fa’aalia ‘e Kaio, ‘o le fa’atuputupula’ia ‘o le nūmera ‘o ‘au Siva Sāmoa ‘i ‘Aukilani, na ūna’ia ai ‘o ia ‘e fa’avae se ‘ausiva ‘i Hawkes Bay, lea ‘ua fa’aigoaina ‘o Le Lumanai Siva Academy.  Na fa’alauiloa ‘i le vāiaso talu ai lea polōketi, ma na lolofi atu ai le mamalu ‘o le atunu’u ‘o lo’o nonofo ma aumau ‘i Hawkes Bay, ‘e molimau le matagōfie ‘o taumafaiga ‘a Kaio fa’apea le fa’atāuaina ‘o le sao ‘o fa’afāfine.  ‘O le isi vāega ‘o le polokalame na tūlaga ‘ese, ‘o se tala na fa’alauiloa na tūsia ‘e se tasi ‘o alo ma fānau ‘o le Lumana’i, na fa’aulutalaina ‘o le weaving love po’o le lalaga alofa.

E lauiloa Annie Kaio, ‘i ana tāleni ‘ese’ese ‘aemaise ‘i le ta’aloga ‘o le voli polo. ‘O ia fo’i ‘o le ta’ita’i ‘o le ‘au’aunaga lagolago ‘a le Mapu Maia ‘i le ‘ōfisa ‘i Hawkes Bay. ‘O lona talitonuga, ‘e ‘avea tāleni ‘i le mūsika, pese ma siva, ‘e fai ma vai fofō ‘i mafatiaga ‘o le soifua mālōlōina ‘o le māfaufau le mental health ‘i tupulaga talavou. ‘O lo’o lagolago mālosi ‘e le Mapu Maia, le National Pasefika Mental Health ma addiction services lea polōketi ‘i Hawkes Bay. 

Link to RNZ (Article) translated by Anna Fa’asolo: https://www.rnz.co.nz/international/pacific-news/527806/le-lumana-i-fa-afafine-identity-and-breaking-down-barriers

ATA: RNZ