Tatala fale muamua ‘o le “Our Whare, Our Fale” i Porirua

‘O le aso ananafi na faia ai se sauniga fa’apitoa ‘e tatala aloa’ia ai le polōketi ‘o fale muamua ‘e 18 na fausia mō tagata Pasefika. ‘O le fa’amoemoe ‘o fale ‘e fa’ataunu’u ai le moemitiga mō ‘āiga Pasefika ‘o fia fa’atau ni fale ‘ae lē gafatia le tau.

‘O le fofoga ‘o le aso ‘o Magele Maria Uluilelata ma Kitiona Tauira. Na tatala āloa’ia ‘i le faigālotu saunia ‘e Rev Hueni Nuku ma na lagiina ‘e le ‘aufaipese ‘a le Pacific Connection, vi’iga le Atua. Na maua le avanoa ‘e faia ai saunoaga fa’apitoa, lea na tatala ‘i le saunoaga ‘a le pule sili ‘o le Central Pacific Collective. Na ia fa’amatala ai le taumafaiga mai ‘o le gāluega. Lona lua saunoa Helmut Modlik, ‘o le pule sili ‘o le Te Rūranga o Toa Rangatira, ‘o lē na fai pā’aga ma le CPC.

 Na saunoa Anita Baker ‘o le pulenu’u o Porirua ‘i le tāua ‘o lea fa’amoemoe ua taunu’u mō tagata Pasefika ‘e fa’atau ai ō lātou fale muamua.

‘O Manu ma Vienna Paongo ‘o le ulugāli’i na fai ma sui ‘o ‘āiga ua fa’atau ō lātou fale ‘i lea polōketi. Sa ‘āuai fo’i Dr Shane Reti, ‘o le Minisitā mo Tagata Pasefika. Na saunoa le faipule o Mana Barbara Edmonds ‘i le sao ‘o le faigāmālō a le Leipa na latou lagolagoina ai lea fa’amoemoe. Ma taualuga ‘i le fa’afiafiaga ‘a le Anamua Fou ma tāpunia ai ‘i le tatalo na ta’ita’ina ‘e le susuga le fa’afeagaiga iā Tui Sopoaga. 

ATA: SCR (Anna Fa’asolo).