Tatala fa’asolo ‘atoa le malae ‘i Turangawaewae

‘A itiiti mai ‘e 13 le āofa’i ‘o isi ‘iwi po’o nu’u ma ‘itū’aiga ‘ese’ese ‘o tagata Māori, ‘ua fa’amāonia ‘o le ‘a o’o atu ‘i le malae ‘i Turangawaewae ‘i Ngaruahia, ‘i le asō mō fa’aaloaloga fa’aleaganu’u ma toe sauniga ‘i le falelauāsiga ‘o le Tupu Māori ‘o Kiingi Tuheitia.

‘E pei ‘ona silafia, ‘o le taimi nei, ‘o lo’o feagai tagata Māori ma le Mālō Niu Sila ma tūlaga fa’avauvau ‘ona ‘o le tu’umālā ai ‘o le Tupu ‘i le Aso Faraile ‘ua mavae ‘i le 69 tausaga ‘o lona soifua.

‘O le Aso Sā ‘ananafi, ‘i lona tolu ‘o aso ‘o le Tangihanga mō Kiingi Tuheitia, sā fa’atasi ai le Kōvana Sili ‘iā Dame Cindy Kiro, ‘ae fa’apea ta’ita’i ma sui ‘o le lotu Māori ‘o le Ratana Church ma ‘iwi ‘e āofia ai Te Arawa, Ngati Tuwharetoa, Ngati Kauwhata, ma Ngati Hine.

‘O le ‘a fa’aauau pea sauniga fa’aleaganu’u nei ‘i Turangawaewae mo isi aso ‘e tolu ‘o lumana’i nei, ma na fa’aālia mai ‘e fa’apea ‘ua ‘amata atu ‘i le  asō, ‘ona tatala ma avanoa le Marae ‘o lo’o ta’oto ai le tino maliu ‘o le Tupu mo le atunu’u ‘atoa ‘e fia asiasi atu iai mō fa’aaloaloga māsani.

‘O lo’o iai le fa’amoemoe, ‘o le ‘a fa’ailoa mai ai ‘i le Aso Tofi ‘o lona falelauāsiga, lē ‘o le ‘a suitūlaga atu ‘i le nofoali’i ‘o le Tupu ‘o Kiingi Tuheitia ‘ua tu’umālō.

Link to RNZ (Article) translated by Lauano Ati Ilaoa: https://www.rnz.co.nz/news/te-manu-korihi/526780/maori-king-kiingi-tuheitia-s-tangi-live-updates-day-four

ATA: Pokere Paewai / RNZ.