Tasi ‘o vaetolu tagata Niu Sila ‘e fa’atali mo le silia ma le lua vaiaso fa’ato’ā maua se avanoa ‘i le fōma’i

‘E to’atasi mai le to’atolu tagata ‘e fa’atalitali mō le silia ma le ta’i lua vaiaso ‘e va’ai ai lana fōma’i, ‘ae silia ma le tasi mai le to’aono, ‘e fa’atalitali ‘i le tolu po’o le fā vaiaso po’o le ‘umi atu fo’i, ‘e tusa ai ma se sā’ili’iliga ‘o le Reid Research ‘a le Leitiō Niu Sila.

‘E to’a afe tagata na fesiligia ‘i le sā’ili’iliga ‘i le vā ‘o le 21 ma le 27 Mati, ma na iloa ai, ‘e tusa ma le 60 pasene ‘o tagata, ‘e lē mafai ‘ona va’ai se fōma’i ‘i totonu ‘o le vaiaso.

Na saunoa le Minisitā ‘o le Soifua Mālōlōina, Simeon Brown, ‘o le ‘u’umi ‘o taimi fa’atalitali, lona uiga ‘o lea ‘e iai lava tagata ‘e le’o maua se avanoa ‘i se fōma’i.  ‘O le maua ‘o le avanoa ‘i le fōma’i, ‘o le fa’amuamua lea ‘a le faigāmālō, ‘o le ala fo’i lea ua o lātou fa’atinoina ai nisi fuafuaga ma ‘o le ‘ā fa’aauau pea ‘ona va’ava’ai po’o ā vāega ‘e tatau ‘ona fa’atino pei ‘ona saunoa le Minisitā.

‘O lo’o tā’ua fo’i ‘i le sā’ili’iliga, ‘e le’o tutusa avanoa ‘o maua mā ‘e fōliga mai ‘o Māori, Pasefika ma tagata ‘e iai mana’oga fa’apitoa ‘e tele ‘ina lipotia ‘e lē ‘o asiasi po’o maua ni avanoa ‘i fōma’i ‘ona ‘o taimi fa’atalitali.

Link to RNZ (Article) translated: https://www.rnz.co.nz/news/political/556965/one-third-of-new-zealanders-waiting-more-than-two-weeks-to-see-gp-poll

ATA: RNZ.