Tāpunia le Pālemene mō le Faigāpālota

‘Ua taualuga taualumaga ‘a le Palemene ‘o Niu Sila ‘i lenei paeā’iga, ma ‘o le avanoa mulimuli ‘o sui faipule ‘aemaise ‘o ta’ita’i ‘o vāega fa’a’upufai, na fai ai a lātou saunoaga, ‘o nisi na fa’aleo ai ni saunoaga mālolosi ‘a’o le’i o’o ‘i le faigāpālota.

‘O fa’afīnauga sā malomaloā ai faipule ‘i le Palemene, sā faitioina ai ‘e ta’ita’i ‘o pātī isi ta’ita’i, ma fa’alauiloa ni mea tetele sa o lātou ‘ausia ma fa’atinoina, fa’atasi ai ma folafolaga ‘o le ‘ā o lātou fa’atino pe ‘ā pale mai ‘i le pālota.

Na saunoa le Palemia Tuisinavemaulumotootua Christopher Luxon, ‘e puipui le tūlaga lelei ‘o la lātou faigāmālō so’ofa’atasi, soso’o ai ma le saunoaga ‘a le ta’ita’i ‘o le Labour, Chris Hipkins

Na saunoa le palemia, ‘o le faigāpālota lenei, ‘e tu’usa’o lava; ‘o le fa’atupu tāolaola ‘e le National ‘o le tamāo’āiga ‘ina ‘ia soifua lelei tagata Niu Sila, ‘ae lē pei ‘o se faigāmālō so’ofa’atasi ‘a le Labour, ‘e māfuli ‘i le fa’aalu ‘o tupe ma lāfoga ma nonō mai tupe. 

Na vave ‘ona fesiligia ‘e Hipkins saunoaga ‘a Tuisinavemaulumotootua ‘e uiga ‘i le mālosi ‘o la lātou faigāmālō so’ofa’atasi.  I le tolu tausaga talu ai, na ia saunoa ai, ‘ā fai ‘e ulufale Christopher Luxon ‘i le faigāmālō fa’atasi ma David Seymour ma Winston Peters, ‘o le ‘ā sili atu lo lā fa’atamō’ega po’o le tomai ‘e fa’atonutonu ai Luxon.  ‘E sesē vāega na ‘ave ‘i ai le fa’amuamua ‘a le faigāmālō, ‘ua mamao ma lēai se so’otaga ma tagata Niu Sila.

Na saunoa Chloe Swarbrick ‘o le Green, ‘o polikiki, ‘e lē ‘o se ta’aloga, ‘ona ‘o le ‘ēse’esega, ‘o le iloa po’o ‘a’ai lou ‘āiga, po’o iai fo’i se fale ‘o nonofo ai.  ‘O lenei paea’iga, na ia iloa ai, ‘o ‘upu fai ‘o le mālō, ‘ua pei ‘o se ta’aloga ‘i vāega fa’a’upufai so’ofa’atasi.

Na saunoa David Seymour, ‘o le ACT lea na mafai ai ‘ona fa’asaoina le $14 piliona mai ana minisitā ma a lātou pōlisi ‘i lenei paea’iga.  Na o lātou galuea’ina ma iloa ai, ‘e tusa ma le ta’i $57,000 mō tagata ta’ito’atasi na pālota mo ‘i lātou. 

‘I le taimi ‘o Vaovasamanaia, na ia fa’ailoa ai, na o’o ‘uma ‘i atumotu ‘e 17 ‘i totonu ‘o le saofa’iga ‘o sui ‘o le Pasefika, ma na fa’alua fo’i ‘ona o’o ‘i Saina.  Na saunoa fo’i Rawiri Waititi ‘e fai ma sui ‘o le Vāega Fa’a’upufai ‘a Māori, ma sā ia fa’amatalaina ai le faigāmālō ‘e pito sili ‘ona tete’e ma feita ‘i Māori.  ‘O le aso 7 Novema le faigāpālota tele ‘a le atunu’u.

Link to RNZ (Article): https://www.rnz.co.nz/news/politics/1540739/parliament-ends-for-another-term-with-sneers-and-cheers

IMAGE/ATA: Pool / STUFF LTD