Tāofia su’esu’ega ‘o le Bowel Cancer

‘E fōliga mai ‘ua tāofia ma ‘ua to’a le polokalame mō le su’esu’eina ‘o tagata ‘e maua ma ‘ua āfāina ‘i le kānesa ‘o le manava, po’o le bowel cancer, ‘i totonu ‘o Niu Sila ‘i le taimi nei.  ‘O se tūlaga ‘ua fa’apopoleina ai le fa’alāpotopotoga mō gāluega lagolago mō ē āfāina ai ‘i lenei gasegase.

‘Ua lua nei tausaga talu ‘ona fa’ailoa mai ‘e le faigāmālō sa iai ‘a le Labour se vaegātupe ‘e tusa ma le $36-miliona ‘e fa’atino ai le su’esu’ega lenei, ‘o le fa’amoemoe ‘autū, ‘ina ‘ia fa’apaū ifo ai ‘i le 50 tausaga le mātutua ‘o tagata Māori ma tagata Pasefika, ‘e tatau ‘ona su’esu’eina ai, mai le tapula’a ‘e 60 tausaga lea sā iai muamua.

Sā fuafuaina ‘e ‘āmata ‘ona fa’agāsolo ‘i se tūlaga fa’ata’ita’i lea polokalame ‘i ni itūmālō filifilia ‘āmata mai ‘i le ‘afa fa’ai’u ‘o le tausaga ‘e 2022, ‘ona fa’atino ai lea ‘i se tūlaga ‘ātoatoa mai iā Iūlai ‘o le tausaga na te’a nei 2023.

Peitai lā, ‘o lea ‘ua sili atu nei ma le 18 māsina talu ‘ona pāsia le tupe mō lenei polokalame, ‘ae nā ’o le tolu itūmālō fa’afalema’i, ia ‘ua o lātou vala’auina tagata Māori ma tagata atumotu ‘ua ‘ātoa le ta’i 50 tausaga ‘o le soifua, ‘ina ‘ia āga’i atu mō le faia o lātou su’esu’ega mō lenei kānesa.  ‘O itūmālō nei ‘o Waikato, Tairawhiti ma le Midcentral.

Na fa’ailoa mai ‘e le tama’ita’i fōma’i ‘o Polōfesa Sue Crengle ‘o le faufautua mō le fa’alāpotopotoga ‘o le Bowel Cancer NZ, ‘o se mea lē manuia tele lenei tūlaga, talu ai ‘ona ‘o se vāega tele ‘o tagata Māori, ‘ua mautinoa ‘e āfāina ‘i le kānesa ‘o le laualo, ‘a o le’i aulia le 60 tausaga ‘o lo lātou soifua, ma ‘e fōliga fa’apāna fo’i le fuainūmera mō tagata Pasefika lātou.

Na tā’ua ‘e le tama’ita’i fōma’i, ‘o lo’o fia iloa ‘e la lātou fa’alāpotopotoga, pē ‘o iai se fa’amoemoe ‘o le Matāgāluega ‘o le Soifua Mālōlōina, le Te Whatu Ora, ‘e toe fa’aauau ai lenei polokalame ‘i se tūlaga fa’anatinati, pē ‘ua nā ‘o se mea tau ‘ina iloga ai lea ‘ua faia ‘i totonu ‘o itūmālō nei ‘e tolu ‘o Niu Sila.

Sa ia fa’amamafaina ‘e mana’omia le faia vave ‘o se fa’ai’uga ‘i lenei matā’upu, ‘ona ‘e to’atele tagata Māori ma tagata Pasefika ‘ua lamatia le soifua ‘i lenei gasegase, ma ‘e ono maua se lāvea’i mō ‘i lātou pe ‘ā maua le avanoa ‘e faia ‘i ai su’esu’ega ‘i le taimi ‘e aulia ai le 50 tausaga ‘o le soifua.

Sā fa’amaonia mai lā ‘e le Minisitā ‘o le Soifua Mālōlōina, ‘o Shane Reti, ‘e fa’apea ‘o le $36-miliona lenei mō le fa’apa’ūina ‘i lalo ‘o le matua ‘o tagata Māori ma tagata Pasefika ‘e agava’a ai mō le su’esu’ega ‘o le bowel cancer, sā pāsia ma fa’atūlagaina ‘e le faigāmālō talu ai ‘i lana tala ‘autū ‘o le tupe ‘i le tausaga ‘e 2022, ‘ae na ia tā’ua, ‘o le taimi nei, ‘o lo’o faia pea ‘i ai fuafuaga ma isi sā’ili’iliga ‘a le Matāgāluega.

ATA: 123rf / RNZ.