Tāofia le faia ‘o tusitusiga ‘i nisi ‘o ā’oga ‘ona ‘o le fa’aaogā sesē ‘o le AI (Artificial Intelligence)

‘E iai ā’oga ‘ua lē toe ‘avea ‘i le fale ‘e fai mai ai ni assignments ma ni essays ‘a tamaiti ā’oga, ‘ona ‘ua tele ‘ina fa’aaogāina ‘e tama ma teine ā’oga le tōmai fa’atekonolosi, ‘o le AI ‘e fa’atino ai ia tusitusiga ae lē ‘o ‘i lātou na tūsia.

Na fa’ailoa mai ‘e le Matāgāluega ‘o Ā’oga ‘e fa’apea, ‘o le fa’aaogāina sēsē ‘o le ātamai lenei ‘o le AI po’o le Artificial Intelligence, ‘o le mafua’aga tonu lava lea ‘o le ‘a lē toe fa’aauauina ai le ‘avea ‘o lipoti tusitusia ma vāega ‘e togi, ma fua iai le ātamai ‘o tamaiti ‘i le vāega muamua po’o le Level One ‘o le su’ega ‘o le NCEA ‘i le tausaga fou.

Na fa’ailoa mai ‘e le Faiā’oga ‘o le Gagana Peretānia ‘i se tasi ‘o ā’oga ‘i ‘Aukilani, ‘o Kit Willett, ‘e telē se suiga na faia ‘e le lātou ā’oga, ‘ina ‘ua iloa ane ‘e ‘i le vā ‘o le 15 ma le 20 pāsene ‘o tamaiti, sā ō lātou fa’aaogāina le AI ‘e fai ai ā lātou meaā’oga ma tali ai fesili ‘o su’ega ‘i le tausaga ‘ua mavae.

‘O le suiga ‘autū ‘ua iai nei, ‘ua lē toe fa’aaogāina ai computers ‘ae ‘ua tusilima essays ‘a tamaiti ā’oga ‘ona fa’ato’ā tā ai lea ‘i le komipiuta pe ‘uma ‘ona tapena le ata fa’ata’ita’i muamua ma siaki lelei ‘e le faiā’oga.

Na fa’ailoa mai lā ‘e le Matāgāluega ‘o Ā’oga ‘e tele ā’oga ‘ua ō lātou faia lea suiga, ‘ua lē toe fa’aaogāina ai tusigā tala nei ‘e ‘ave ‘i le fale ‘e togi ai pe assess le tōmai ‘o tamaiti, ‘ae ‘ua faia nisi ‘auala ‘e su’esu’eina ai lō lātou malamalama ‘i matā’upu ‘o lo’o a’oa’oina.

Na tā’ua mai fo’i ‘e le matāgāluega, ‘o le fa’aaogāina ‘o le AI, ‘e tusi pepelo ai lipoti ma assignments ‘a tamaiti, ‘o se tasi lea ‘o mafua’aga ‘autū, ‘o le ‘a lē toe fa’aaogāina ai ‘e le NZQA ia lipoti tusitusia ‘e assess ai agava’a ‘o le fānau ā’oga mo ni standards se 19 ‘o le su’ega ‘o le NCEA ‘i le tausaga fou 2025.

Na tā’ua mai, ‘e fa’apea, ‘o lo’o gālulue nei le Matāgāluega ‘o Ā’oga ma le NZQA mō nisi ta’iala fou mō faiā’oga ma tamaiti ā’oga ‘i le pūlea lelei ‘o le su’ega lenei ‘o le NCEA, ma ‘o le ‘a faia ai ni feiloā’iga fa’apitoa ma faiā’oga ma ta’ita’i ‘o ā’oga ‘ese’ese a’o le’i ‘uma le tausaga nei.

Link to RNZ (Article) translated by Lauano Ati Ilaoa: https://www.rnz.co.nz/news/national/528800/schools-abandon-take-home-assignments-after-artificial-intelligence-used-to-cheat

ATA: RNZ.