Taofia ‘e le Mālō Niu Sila polokalame ‘o tamaiti vaetama mai fafo, ‘ae pito sili ‘ona a’afia ai Sāmoa

‘Ua taofia mō le taimi nei ‘e le mālō ‘o Niu Sila, nisi ‘o polokalame ‘o tamaiti vaetama mai fafo, ‘ae pito sili ‘ona a’afia ai Sāmoa, ‘ona ‘o atugāluga ‘i matā’upu ‘o lo’o sauāina ai ni tamaiti na vaetama mai fafo.

Na fa’aalia ‘e le Minisitā Lagolago ‘o Fa’amasinoga, Nicole McKee, ‘o lo’o fa’agāsolo ‘i le taimi nei, taumafaiga ma le mālō ‘o Sāmoa ‘e faia se fuafuaga ‘i fa’afītāuli ‘o lo’o tutupu ‘i polokalame ‘o lo’o vaetama mai ai tamaiti mai fafo.  Peita’i na ia saunoa, ‘e tūmau pea ‘ona taofia le vaetama mai ‘o tamaiti, se’i vaganā ‘ua mautū ma lava ni puipuiga. 

Na fa’aalia ‘e McKee, ‘e 1000 le aofa’iga ‘o tamaiti ‘e vaetama mai fafo ‘i tausaga ta’itasi.  Na nofo silafia McKee ‘i le matā’upu talu mai Nōvema ‘i le tausaga talu ai, ma ia saunoa ai, ‘o le taofia ai ‘i le taimi nei ‘o le polokalame, ‘o le tali atu lea ‘i matā’upu na vaetama mai ai tamaiti mai fafo ma feagai ma sauaga. 

‘O le Aso Lua na folasia fa’anatinati ai le Teuteuga ‘o le Pili ‘o tamaiti vaetama ma vave ai ‘ona pāsia ‘i ona vāega ‘uma.  ‘O le vāiaso nei ‘e ‘āmata fa’amamaluina ai le tūlāfono ma ‘o le ‘ā fa’atūmau pea, se’ia aulia se aso ‘e fa’atūlaga mai ‘e le Kōvana Sili pe se’i aulia fo’i le aso 1 Iūlai 2027. 

‘O le taimi nei, ‘e 86 atunu’u ‘e le’o aofia ‘i le tūlāfono po’o le tapu, ma ‘e na’o Tonga ma Fiti ‘o le Pasefika.  ‘O Tokelau, Niue ma le Atu Kuki, ‘e le’o aofia ai fo’i, ‘ae ‘ona ‘o atunu’u ‘o lo’o ‘i lalo ‘o le fa’amalumaluga ‘o le pūlega ‘a Niu Sila.

Na saunoa McKee, ‘o lo’o gālulue fa’atasi le Matāgāluega ‘o le Vā ‘i Fafo ma sui ‘o le mālō ‘o Sāmoa, ‘e fa’avae ni māliliega mō le fefa’asoaa’iga ‘o fa’amatalaga.  ‘E tusa ma le 700 tamaiti ‘o lo’o vaetama mai Sāmoa, fa’atusatusa ‘i le 500 mai isi atunu’u.  ‘E le’i mafai ‘e McKee ‘ona fa’amaonia po’o ai atunu’u ‘e pito sili ‘ona tele tamaiti ‘o lo’o sauāina ‘o ē na vaetama mai. 

‘E 11 tausaga na fa’asalaina ai ‘i le falepuipui, Joseph Auga Matamata ‘i le 2020 ‘ona ‘o fa’afītāuli fo’i fa’apēnei.

Link to RNZ Pacific (Article): https://www.rnz.co.nz/international/pacific-news/573312/new-zealand-tightens-international-adoptions-samoa-most-affected

ATA: SCR (file).