Taofia ‘e le fa’amasinoga le fa’aaogāina ‘o tupe ‘ātoa ma fanua ‘o ni ali’i se to’alua ‘o lo’o masalomia ‘i ni faiga taufa’asesē ‘i le MSD.

‘Ua taofia ‘e leoleo ‘i se poloa’iga mai le Fa’amasinoga le fa’aaogāina ‘o ni teugātupe fa’apea ai ma fanua, ‘o ni ali’i se to’alua, ‘o lo’o masalomia ‘i le faia ‘o ni faiga taufa’asesē ‘i le Matāgāluega ‘o le Ātīna’e Lautele, le Ministry of Social Development, po’o le MSD.
‘O le māsina na te’a nei na faila ai ‘i luma ‘o le Fa’amasinoga Maualuga ‘i ‘Aukilani ia fa’amatalaga āloa’ia ‘e tusa ai ‘o le gaoia ‘o se vaegātupe tele ‘i ni ‘auala taufa’asesē mai le matāgāluega lenei ‘a le MSD, ‘e ni ali’i se to’alua.  Na soso’o lea ma le faia ‘o se talosaga ‘a leoleo, mō se pōloa’iga ‘a le Fa’amasinoga, ‘e tāofia ai nei ali’i mai le fa’aaogāina ‘o ā lā’ua teugātupe ‘ātoa ma o lā fanua ‘ūmia sa’oloto, ‘a’o fa’agāsolo ai su’esu’ega ‘o lenei matā’upu.

Na fa’aalia mai ‘e fa’apea, ‘e tusa ma le $2-miliona Tālā le aofa’iga ‘o le sēleni ‘a le MSD, ‘o lo’o masalomia le a’afia ai ‘i lenei matā’upu.  ‘O fa’amaumauga ‘a leoleo ‘o lo’o tā’ua ai le tupu ‘o lenei fa’afītāuli ‘i le vā ‘o Sētema ‘o le 2017 ma le māsina ‘o Mati ‘o le tausaga na te’a nei 2023.  ‘O ali’i ‘e to’alua ‘o lo’o a’afia ai ‘o lo’o masalomia ‘i le faia sesē ‘o le totogi po’o peimeni mō ni meāfale mai se kamupanī mō tagata penefiti sā talosaga atu ‘i le MSD mō se fesoasoani.

 Link to RNZ (article) translated by Savelina Kasiano:https:https://www.rnz.co.nz/news/national/532829/police-probing-alleged-2m-msd-fraud-seize-cash-property

Ata: RNZ / Rebekah Parsons-King