Tāofi le fa’afo’iga ‘o se tinā ‘i Iran

Na manumālō se tinā ‘e 84 tausaga le matua, ‘ua maliu lana tane, ‘i lana talosaga toe iloilo ‘e fa’atatau ‘i le toe fa’afo’i fa’amālosi po’o le tīpoti ‘o ia ‘i Iran, ma ‘ua tu’uina atu ‘i ai ‘e Niu Sila sona visa nofo mau.

Na fofogaina ‘i luma ‘o le Immigration and Protection Tribunal lana talosaga, ma ia fīnau ai, ‘e lē saogalēmū ‘ona toe fo’i lana tama tama la te nonofo ‘i Tehran, ‘ona ‘o lana gāluega  ‘o lo’o galue ai, ‘i le vāega ‘o le puipuiga ‘o le atunu’u.  ‘O lana tama ‘ua sitiseni Niu Sila ma ‘ua tūlaga lelei lona soifuaga ‘i lenei atunu’u pei ‘ona fa’aalia ‘e le tinā.  ‘E lē gata ‘o lo’o galue ‘i se kamupanī ‘e iai lo lātou sao ‘i le puipuiga ‘o Niu Sila, ‘ae lua fo’i ona sitiseni, ma ‘o tūlaga ia, ‘e matuā lē saogalēmū ai lava pe ‘ā malaga ‘i Iran.  ‘E ono taofia pe ‘ā taunu’u. 

Na asiasi mai le tinā matua ‘i lana tama ‘i Niu Sila ‘ae pepesi loa le Kōviti ma nofo ai lava se’ia o’o ‘i le fa’ai’uga ‘o le 2021 ‘a’o le’i toe fo’i ‘i Iran.  Peita’i, ‘o sana āsiasiga pito lata mai ‘i Niu Sila, na a’afia ai ‘i se ma’i oso fa’afuase’i a’o sauni ‘e malaga ‘i le va’alele.  Na fa’amaonia ‘e le fōma’i le popole ma le atu ‘o le loto ‘o le tinā ‘i le toe fo’i ‘i Iran.  ‘E matuā faigatā fo’i ‘i lana tama, ‘o se software engineer ‘ona nofo ai ‘i Iran. 

‘I luga ‘o le ‘upega tafā’ilagi ‘a Niu Sila mō fautuaga ‘i faigāmalaga, ‘o lo’o iai le fautuaga mo le atunu’u lautele, ‘e fa’apea ‘e mātua maualuga lava le tūlaga lamatia ‘o le soifua mō ē malaga ‘i Iran, ma ‘e lē tatau ‘ona fuafua ni faigāmalaga ‘i Iran, ‘ona ‘o vevesi ma tūlaga ogaoga ‘o iai i la lātou puipuiga ma le saogalēmū.

Link to RNZ (Article) translated: https://www.rnz.co.nz/news/national/574697/likely-prove-fatal-deportation-of-84-year-old-widow-to-iran-halted

ATA: RNZ.