Tāofi ‘e le ‘Ōfisa ‘o Lāfoga ‘ona toe fa’asalalau fa’amaumauga patino ‘o ‘au fai lāfoga ‘i ‘upega ‘o feso’ota’iga

‘Ua tāofi ‘e le ‘Ōfisa ‘o Lāfoga (IRD), le toe fa’aaogā ‘o fa’amaumauga patino ‘o tagata totogi lāfoga ‘e faia ai fa’asalalauga fa’apisinisi ‘i luga ‘o ‘upega ‘o feso’ota’iga.  Na māfua ‘ona na tete’e le to’a 8000 ‘o tagata totogi lāfoga ‘i le ‘ōfisa, ‘e fa’atatau ‘i la lātou faiga lea ‘o lo’o fa’asoa ai fa’amaumauga ‘o tagata ‘e fa’atatau ‘i fa’asalalauga fa’alauiloa. 

Na fa’ailoa ‘e le Komesina ‘o le IRD Peter Mersi ‘i le ‘au fa’asalalau ‘i le Aso Lua, sa o lātou talitonu lava, ‘e matuā ‘āto’atoa ‘ona saogalēmū le polokalame, mā ‘o se ‘auala ‘e talafeagai lelei tupe ‘o lo’o fa’aaluina ai, ‘ina ‘ia mafai ‘ona o’o atu fa’amatalaga fa’atatau ‘i lāfoga, ‘i tagata ma fa’alāpotopotoga ‘o lo’o fa’atūtū tonu ‘i ai, peita’i, talu ai le to’atele ‘o lo’o tete’e ‘i lea faiga, ‘ua faia ai sa lātou fa’ai’uga, ‘e lē mafai ‘ona o lātou toe fa’aaogāina.

‘E lua ni matā’upu sā māua ‘e le IRD, sa fa’ailoa fa’alaua’itele ai fa’amaumauga patino ‘o ni tagata, ‘ae sā le’i lelei ‘ona nātia.  ‘E to’a 268,000 tagata fai lāfoga na aofia ‘i lea matā’upu, mā ‘o le ‘ā tusi atu ‘i ai le IRD ‘e fa’amatala ma fa’ato’ese ‘i ai ‘i le isi 24 itūlā pei ‘ona saunoa le komesina ‘i le Aso Lua.  Na fa’ailoa le fiafia ‘o David Buckingham, ‘o se konesale ‘i matā’upu tau ‘i gāluega ‘i Queenstown ‘i lea fa’ai’uga, ma ‘o ia lea mātauina le gāioiga ‘a le IRD, ma ‘ave ai lana fa’aseā, ‘i nai māsina ‘ua tuana’i atu.

Link to RNZ (Article) translated by Savelina Kasiano: https://www.rnz.co.nz/news/national/532905/ird-to-stop-sharing-taxpayers-details-with-social-media-platforms-following-backlash

ATA: Supplied. (RNZ)