Talosagaina ‘e le PSA se su’esu’ega ‘e tusa ‘o le vāea ‘o tagata faigāluega IT ‘a le soifua mālōlōina

‘Ua talosagaina ‘e le Sōsaiete ‘a Tagata Faigaluega ‘a le Mālō, le PSA, ‘ia le Komesina ‘o Matā’upu Patino ‘i le Tagata lava ia, le Privacy Commissioner, mō se su’esu’ega fa’anatinati ‘e uiga ‘i le fuafuaga ‘a le Pūlega ‘o le Soifua Mālōlōina, ‘e vāea ma fa’amālōlō le tusa ‘o le ‘afa ‘o lana ‘aufaigāluega tau feso’ota’iga televavave po’o le IT.

‘O lea fuafuaga, ‘o se vāega ‘o taumafaiga ‘a le mālō ‘e fa’aitiitia tupe fa’aalu ‘i gāluega fai, ‘a le Matāgāluega lenei ‘o le Soifua Mālōlōina.
‘O Tēsema lea na fa’ailoa mai ai ‘e le Te Whatu Ora, ‘o le ‘ā fa’amuta le 47 pasene ‘o gāluega pē tusa lea ma le 1100, le aofa’i ‘o tūlāga tofi ‘e aofia ai ma tūlaga ‘o lo’o avanoa ‘e lē’o iai nisi, ‘i le vāega lenei ‘o feso’ota’iga po’o le IT ‘i itū ‘ese’ese ‘o le atunu’u, ‘i se vāega ‘o fuafuaga nei ‘e fa’aitiitia tupe fa’aalu ‘i ana gāluega fai.

Na fa’ailoa mai ‘e le Sui Failautusi ‘o le PSA, ‘o Fleur Fitzsimons, ‘e mautinoa lava ‘e telē le āfāina ai ‘o gasegase, pe ‘ā fa’amuta gāluega ‘a tagata nei.

‘O le māfua’aga lea ‘ua se’e ai le PSA ‘e faia lenei la’asaga ‘e lē māsani ai ‘o le talosagaina ‘o le Privacy Commissioner, mō le faia ‘i ai ‘o nā su’esu’ega fa’anatinati, ‘ona ‘o le tūlaga lamatia ai ‘o le saogalēmū ma le malu puipuia ‘o fa’amatalaga tōtino ‘o gasegase ta’itasi ‘i lenei fuafuaga.

Na fa’amamafaina mai ‘e le tama’ita’i sui failautusi, ‘ua alagātatau lenei la’asaga, ‘ona ‘e fōliga mai ‘ua tā’a’alo ma fa’atalalē le faigāmālō ‘i fa’amaumauga patino ‘o tagata mama’i.

Link to RNZ (Article) translated by Lauano Ati Ilaoa: https://www.rnz.co.nz/news/national/541374/call-for-privacy-commssion-investigation-into-health-it-staff-cuts

ATA: RNZ / Samuel Rillstone