Talosaga pūlēgānu’u ‘i le mālō ‘e fa’aitīitia a’afiaga mai ta’aloga faitupe

‘Ua fuafua le Pūlēgānu’u ‘a Kalaiesetete, ‘e talosaga ‘i le mālō, ‘ina ‘ia iai nisi fuafuaga ‘e faia ‘e tali ai ‘i a’afiaga mai ta’aloga faitupe, peita’i, ‘ua toe tu’u atu ‘i tua ni fa’ai’uga ‘e faia ‘iā lātou lava pōlisi ‘o ta’aloga faitupe. 

Sa iai le fuafuaga ‘i le Aso Lulu ‘e faia ai se pālota ‘a le pūlēgānu’u ‘iā lātou pōlisi mō nofoaga ‘o faia ai ta’aloga faitupe ma le TAB ‘ina ‘ua māe’a ai se iloiloga ‘a le ‘aufaigāluega.  ‘O se fautuaga ‘a le ‘aufaigāluega ‘a le pūlēgānu’u, ‘ina ‘ia tāmau pea le pōlisi ‘o lo’o iai nei, lea sa ‘āmata mai lava ‘i le tausaga ‘e 2004, fa’atasi ai ma le pōlisi, ‘e taofia ai ‘ona toe fa’atūina nisi fale po’o nofoaga fou ‘e fa’agaioi ai māsini mō ta’aloga faitupe, ma fa’asāina fo’i ‘ona sui nisi fale po’o nofoaga ‘e sifi ‘i ai ia ta’aloga faitupe.  ‘I se tusi ‘o le ‘ā fa’ao’oina atu i le Minisitā mō Matā’upu ‘o le Lotōifale, Brooke van Velden, ‘ua tā’ua ai ‘e le pulenu’u Phil Mauger, ‘o le iloiloga ‘a le pūlēgānu’u ‘i pōlisi, na iloa ai ni popōlega ‘e uiga ‘i le si’itia pea ‘o ta’aloga faitupe ‘i luga ‘o ‘upega ‘o feso’ota’iga, ‘aemaise lava ‘i pisinisi ‘e fa’amautū ‘i fafo ‘ae lē’o fa’atūlāfonoina ‘i Niu Sila.  ‘Ua una’ia ai ‘e le pūlēgānu’u le faigāmālō, ‘ina ‘ia fa’atupu manatu ‘iā ‘i lātou se isi ‘auala ‘e fa’aitīitia ai a’afiaga mai ta’aloga faitupe.  ‘E pito sili atu ‘ona tele masini poka ‘i Kalaiesetete pe ‘ā fua ‘i le faitau aofa’i ‘o tagata, nail ō se isi lava ‘a’ai ‘i Aotearoa.  Na iloa ‘i le iloiloga, ‘e 93.4 miliona tālā ni tupe na maumau ‘ona ‘o masini poka ‘i le ‘a’ai ‘i le tausaga talu ai.

Link to RNZ (Article) translated by Savelina Kasiano: https://www.rnz.co.nz/news/national/527054/problem-gambling-council-asks-government-to-do-more-to-minimise-harm

ATA: Sāmoa Capital Radio (file).