Talosaga le ‘au’aunaga ‘o tāpenaina mea’ai ‘a tamaiti ā’oga mō se fesoasoani ‘a ‘Ausetālia

Na talosaga le fa’alāpotopotoga ‘a le School Lunch Collective ‘i le vāiaso nei ‘iā ‘Ausetālia mō se fesoasoani ‘ina ‘ia mautinoa ‘e lava taumafa mō tamaiti ā’oga ‘i Niu Sila.  ‘Ua fa’ailoa le tu’u atu ‘o le ‘au’aunaga ‘a le Libelle ‘e va’aia ‘e le Deloitte ma fa’aauau ‘ona fa’agāioi le pisinisi ‘ae sa’ili nisi tupe ‘e fa’asao ai le pisinisi ma totogi ai ‘aitālafu.  ‘O le Libelle ‘o lo’o gaosia ma tāpenaina taumafa ‘e 125,000 ‘i le aso, mō tamaiti ā’oga.  ‘Ua tausisi pea le mālō ‘o le ‘ā fa’aauau ‘ona tāpena ‘e le School Lunch Collective lea ‘o lo’o aofia ai le Libelle, mea’ai ‘a tamaiti, ‘i ā’oga ‘e 466 pei ‘ona aofia ‘i le konekarate pei ‘ona tā’ua ‘e le Leitiō Niu Sila.

‘O taumafa mō le tele ‘o ā’oga ‘i le Aso Lulu, ‘o ni taumafa ‘ua māe’a ‘ona tāpena ma āfīfī mai ‘Ausetālia, mā ‘o le tele lava, ‘o lasagne peita’i ‘o nisi ‘o ia taumafa ‘o le sisi ma le macaroni.  ‘Ae na tā’ua ‘e le ‘aufaigāluega ‘a le Kaitao Intermediate, ‘e le’i fiafia tele ‘i ai tamaiti ‘o le ā’oga, ‘e ui na taunu’u atu taumafa ‘i le taimi fa’atūlagaina.  Na tā’ua ‘e le Compass, le fa’alāpotopotoga ‘o lo’o ‘ūmiaina le konekarate ‘o mea’ai ‘a tamaiti, ‘o le ‘ā fa’amautinoa ‘e maua lava totogi ‘o le ‘aufaigāluega ‘a le Libelle ma fa’atinoina pea a lātou galuega.  Na tā’ua ‘e le Deloitte, ‘ā lē ‘o le Aso Lua po’o le Aso Lulu ‘o le vāiaso fou, ‘e fa’alauiloa ai se līpoti.

‘O le aso ananafi, na saunoa ai le peresetene ‘o le fa’alāpotopotoga ‘a puleā’oga, na fa’ailoa atu ‘e le Minisitā Lagolago ‘o ā’oga, David Seymour ‘i le Aso Gafua, ‘e mafai lava ‘ona sui ‘au’aunaga ‘o fa’atinoina le tāpenaga ‘o taumafa ‘ā fānau.  Peita’i, mulimuli ane, na saunoa Seymour ‘i le Leitiō Niu Sila, ‘e le’o iai se manatu ‘o le mālō ‘e fesuia’i ai ia fa’alāpotopotoga.  Na fa’amaonia ‘e le ‘Ōfisa ‘o le Su’etusi Sili, ‘ua o’o atu ni fetaliā’iga ‘e uiga ‘i matā’upu tau ‘i le polokalame ‘a ā’oga, ma sā iloilo pe fa’agāsolo se su’esu’ega.

Pe tusa ma le $6.60 ‘Ausetālia le tau ‘o le taumafa ‘e tasi mō tamaiti ‘Ausetālia, ‘ua fa’aluaina le $3 le tau ‘o lo’o pāketi ‘i ai mea’ai ‘a tamaiti ā’oga ‘a Niu Sila ‘i lalo ‘o lea polokalame.

‘E lē tasi se fa’afītāuli na tūla’i mai ‘i le polokalame ‘o mea’ai ‘a tamaiti ‘i ā’oga talu ‘ona suia ‘i lalo ‘o le faigāmālō ‘o iai nei.

Link to RNZ (Article) translated: https://www.rnz.co.nz/news/national/544587/school-lunch-provider-turns-to-australia-for-help

ATA: RNZ / Marika Khabazi