Talia ‘e le pulenu’u Tory Whanau le filifiliga ‘o se sui mai le mālō ‘e māta’itūina le Pūlēgānu’u

‘Ua talia fiafia ‘e le pulenu’u ‘a Uēligitone, Tory Whanau, le fa’ai’uga ‘a le Minisitā ‘o Faigāmālō Lāiti, ‘ua tōfia ai se sui mai le mālō, ‘e mata’itūina gāluega ‘a le Pūlēgānu’u.  Sa faia se pālota ‘a le pūlēgānu’u pe fa’atau ‘ese atu a lātou siea ‘e 34 pasene ‘i le malae va’alele ‘i Uēligitone.  ‘O se tasi lea ‘o vāega ‘o fuafuaga mamao ‘a le pūlēgānu’u, ‘e maua mai tupe ‘i le fa’atauga ‘o siea, ‘ona fa’aaogā lea ‘e fa’avae ai se fa’aputugātupe fa’a’inivesi.  ‘E tatau ‘ona toe teuteu le fuafuaga mamao ‘a le pūlēgānu’u ‘ina ‘ua lē pāsia lea fa’anaunauga. 

‘I se pepa ‘o fa’amatalaga na tā’ua ai ‘e le Minisitā ‘o Faigāmālō Lāiti Simeon Brown, na popole ‘i se mālosi ‘o le pūlēgānu’u ‘e fa’afoe ai teuteuga ‘i la lātou fuafuaga mamao po’o le long-term plan.  Na fa’aalia ‘e Brown, na tusi atu le mālō ‘i le pūlēgānu’u ma fa’a’auivi atu ‘i ai māfua’aga ma fa’amoemoega ‘e ta’ialaina ai le iai lea ‘o le sui ‘o le mālō ‘e tulimata’iina taualumaga ma fa’atinoga ‘a le pūlēgānu’u.  ‘E tatau ‘ona tali atu le pūlēgānu’u ‘i totonu ‘o aso ‘e 10.

Link to RNZ (Article) translated by Savelina Kasiano: https://www.rnz.co.nz/news/political/531547/wellington-council-intervention-mayor-tory-whanau-accepts-appointment-of-crown-observer

Ata: RNZ / Samuel Rillstone – Wellington mayor Tory Whanau.