Tali Christopher Luxon ‘i faitioga ‘e uiga ‘i teuteuga mō penefiti

Na’o se fuainūmera to’aitiiti ‘o tagata penefiti ‘o lo’o sa’ili ni gāluega ‘e le’o ‘ausia tu’utu’uga ‘o matāfaioi ‘e tatau ‘ona lātou faia, pei ‘ona saunoa le Palemia Christopher Luxon. 

‘Ua faitiona ‘e le Itū Agai le gāioiga ‘a le mālō, ‘e matuā su’esu’e ma tulituliloa ai tagata penefiti.   ‘Ua ‘ioe le kapeneta ‘e toe fa’amālosi ātili mai le ‘āmataga ‘o le 2025, le work check-ins, ‘o le polokalame ‘e fa’amautinoa le feso’ota’i fai fai pea ‘o tagata penefiti ma le Matāgāluega ‘o le Ātina’ega ‘o Aga Feso’ota’i (MSD) ‘ina ‘ia mafai ‘e le mālō ‘ona siaki le tūlaga ‘ua iai le su’ega ‘o ni a lātou gāluega.   Mā ‘o le fa’anaunauga ‘o le mālō, ‘e tatau ‘ona ta’i ono māsina ma toe talosaga tagata mo le penefiti ‘ae lē ‘o le ta’i tausaga ma talosaga.  ‘Ae ‘āfai ‘e iai ni solitūlāfono, ‘o le ‘ā fa’amau ai pea ‘i fa’amaumauga mō tausaga ‘e lua, ‘ae lē tasi.  ‘O le ‘ā mafai fo’i ‘i lalo ‘o ni suiga ‘o le tūlāfono, nisi tapu fou, ‘e pei ‘o le fa’amālosia ‘ona faia ‘o gāluega faia fua mō le atunu’u, po’o ni pepa ‘e pūleaina lelei ai le fa’aaogaga o tupe.  ‘O le saunoaga ‘a Luxon ‘i le Morning Report, ‘o le to’atele lava ‘o tagata ‘o lo’o tali le penefiti, ‘o lo’o fa’amalieina tu’utu’uga, peita’i, ‘e tatau ‘i tagata ‘uma ‘ona sāuni ‘e gālulue.  Na ia saunoa fo’i, ‘e faigōfie lava tiute mō le tagata ‘e ao ‘ona fai.  Mō tagata ‘e manana’o ‘e maua le aiā tatau ‘o le ‘avea ai ma tagātānu’u ‘o Niu Sila, lea ‘e agava’a ai ‘i le penefiti, ‘e iai foi lona tiute fa’atino, ‘o le sa’ilia lea ‘o se gāluega pei ‘ona saunoa Luxon. 

Link to RNZ (Article) translated by Savelina Kasiano: https://www.rnz.co.nz/news/political/524982/we-re-not-asking-much-christopher-luxon-defends-benefit-sanctions

ATA: PM Christopher Luxon (RNZ) / Reece Baker.