Tale Vivini: Fautuaina tagata ‘ina ‘ia fai nei loa tui puipui

‘E 187 tagata na fa’amauina na a’afia ‘i le tale vivini ‘i le māsina talu ai.  Na fa’aalia ‘e le Soifua Mālōlōina ‘a Niu Sila, ‘e telē lava le avanoa ‘e pepesi ai le fa’ama’i ‘i totonu ‘o le atunu’u.  ‘Ua ūna’iina ai tinā ma’itaga ma isi ‘e pito sili ‘ona lamatia gōfie ‘i nei a’afiaga, ‘ina ‘ia faia nei loa tui puipui. 

Na fa’aalia ‘e le fa’atonu sili ‘o le puipuiga ‘o le soifua mālōlōina ‘a Niu Sila, Dr Susan Jack, ‘o lo’o nofo māta’alia Niu Sila ‘i le ono pepesi ‘o  le tale vivini.  Sā fa’amauina le to’a 75 na a’afia ‘i le fa’ama’i ‘i le māsina ‘o ‘Aukuso.  ‘O lo’o maualuga fo’i le nūmera ‘o tagata ‘ua a’afia ‘i le tale vivini ‘i ‘Ausetālia ma isi vāega ‘o le lalolagi.  Na saunoa Dr Jack, ‘e pito sili ‘ona iai le popōlega mō pepe fou fa’ato’ā fānanau ma ‘ua fautuaina mālosi ai tinā ma’itaga ma isi tagata ‘e faigōfie ‘ona ‘apo ‘e fa’ama’i, ‘ina ‘ia fai nei loa tui puipui.

Link to RNZ (Article) translated by Savelina Kasiano: https://www.rnz.co.nz/news/national/530338/whooping-cough-fears-we-re-asking-people-to-take-action-now

ATA: Low rates of vaccination were driving the risk of transmission of whooping cough. (File) RNZ.