Tala tu’umumusu ‘i le fevaevaea’i ‘i le ta’ita’iga ‘o le National

Na vala’au ‘i le aso ananafi ‘e le Palemia Tuisinavemaulumoto’otua Christopher Luxon se feiloa’iga fa’anatinati ‘a lana vāega fa’a’upufai ‘i le taeao nei, ‘o le ala lea ‘ua toe lagalagā ai finagalo ma manatu ‘o le to’atele ‘aemaise ‘o līpoti ‘a le ‘au tusitala, ‘e fa’atatau ‘i le ta’ita’iga ‘a Tuisinavemaulumoto’otua.  ‘Ua manatu fo’i nisi, ‘ua fa’ailo mai ai ‘ua fevaevaea’i ma fa’aleagaina ai le nofo lelei ‘o le vāega fa’a’upufai ‘a le National. 

‘O le māsina ‘o ‘Aperila na faia ai fo’i se pālota ‘a le National ‘e fa’atatau ‘i le tofiga ta’ita’i peita’i na toe saofia mai ai.  Na fa’aalia ‘e lē sa ‘avea ma faipule ‘o Pakuranga, Maurice Williamson ‘i luga ‘o le Checkpoint, na ia mātauina lava ni taimi sā lu’itauina ai le ta’ita’iga ‘a le vāega fa’a’upufai ‘i le 30 tausaga na iai ‘i le Palemene.  ‘Ae mō le taimi nei, ‘e na’o le to’alua lava tagata na ia mātauina pe to’atolu fo’i, ‘e fōliga mai ‘e onomea ‘i le tofiga ta’ita’i. 

‘O Erica Stanford, ‘i lona ia lava iloa, ‘o se tasi ‘o minisitā ‘o lo’o lelei le fa’atinoga ‘o lana gāluega.  Sā tele fo’i tala fe’avea’i ‘i luga ‘o feso’ota’iga fa’aonapō nei, ‘iā Chris Bishop.  ‘E iai fo’i lona manatu, ‘o Mark Mitchell le isi ‘e faigōfie lava ‘ona ‘avea ma sui tauvā ‘e iloga ‘i le tofiga ta’ita’i, ‘ae ‘ailoga ‘e mana’o ai pei ‘ona saunoa Williamson.

Link to RNZ (Article): https://www.rnz.co.nz/news/politics/966438/speculation-over-national-party-leadership-divisive-and-corrosive-says-former-mp

IMAGE/ATA: RNZ / Samuel Rillstone