Ta’ita’i Barbara Edmonds ‘i le polokalame tau le tamāo’āiga ‘a le Pātī ‘a le Labour

‘O le tama’ita’i faipule ‘o le itūmālō Mana, le alo ‘o Sāmoa ‘iā Barbara Edmonds, lea ‘ua tōfia ‘e fa’auluulu ‘i ai le fa’atinoina ‘o le Polokalame tau ‘i le Tamāo’āiga ‘a le Pātī ‘o le Labour.

‘O lo’o tūmau fo’i Barbara ‘i lana matātā ‘autū, ‘o ia ‘o le Sui So’o‘upu ‘o le Labour mō matā’upu tau Tupe, ‘ae fa’apea matā’upu tau ‘i le Tamāo’āiga, ‘ae ‘ua fa’aopoopo atu ‘i ai ma le matātā fou lea ‘ua fa’aigoaina ‘o Tupe Fa’asao ma Tupe Inivesi, le Savings and Investment, ma ‘ua ia ta’ita’ia ai le tūlaga aoao ‘o polokalame tau ‘i le tamāo’āiga ‘a le Labour.  ‘E lē gata i lea, ae ua se’e ane foi le tamaitai faipule ‘o MANA, ‘i le tūlaga tolu ‘i le fa’asologa ‘o le tūlaga sīnia ‘o faipule ‘o le Labour ‘i le taimi nei.

‘O le isi faipule Pasefika, le ali’i ‘o Tangi Utikere, lea ‘o lo’o tū mai ‘i le itūmālō ‘o Parlmerston North, ‘ua si’itia fo’i lona tūlaga, mai le nūmera 19 sā iai ‘i le fa’asologa, ‘i le nūmera 12 ‘i le taimi nei, ma ‘ua tōfia ‘e ‘avea ma sui so’oupu mō matā’upu tau ‘i Faigāmālō Fa’alōtoifale, po’o le Local Government.

‘O ia suiga, ‘i le toe fetu’una’iga ma le toe fa’atūlagaina ‘ātoa ‘o matāfaioi ‘o faipule ‘a le pātī ‘o le Labour, na fa’ailoa mai āloa’ia ‘e le ta’ita’i ‘o le Labour, ‘iā Chris Hipkins ‘i le fa’ai’uga ‘o le vaiaso.
Sā tā’ua ai ‘e Hipkins, ‘o se vāega ‘o tāpenaga ‘a la lātou vāega fa’a’upufai mō le fīnauina ‘o le isi pālota ‘ātoa ma le ta’ita’ia ‘o le isi faigāmālō ‘a Niu Sila ‘e soso’o ai nei.

‘O le fa’asologa fou lā ‘ua iai nei ‘o le Pātī a le Labour, ‘o lona ta’ita’i ‘o Chris Hipkins, sui ta’ita’i le tama’ita’i  Carmel Sepuloni, tūlaga tolu atu ai Barbara Edmonds, tūlaga fā le isi tama’ita’i, ‘o Megan Woods, tūlaga lima le ali’i faipule Māori ‘o Willie Jackson, tūlaga ono le tama’ita’i ‘o Ayesha Verral ‘ae lona fitu ai le ali’i faipule ‘o le Wairarapa ‘iā Keiran McAnulty, ‘e pei ‘ona silafia, ‘e 34 le aofa’iga ‘o faipule ia ‘o lo’o iai nei ‘o le pātī ‘a le Labour ‘i totonu ‘o le Palemene, ‘i le paea’iga ‘o lo’o fa’agāsolo nei.

Link to RNZ (Article) translated: https://www.rnz.co.nz/news/alert-top/544048/chris-hipkins-announces-new-labour-economic-team-tangi-utikere-promoted

ATA: RNZ / Samuel Rillstone