Tagi fa’atōsaga ‘e fa’asaga ‘i le mālō

‘E silia ma le 1,500 fa’atōsaga ‘o Lead Maternity Carers po’o LMCs ‘ua tu’uina atu sa lātou tagi ‘i le Fa’amasinoga Maualuga ‘i Uēligitone ‘e fa’asaga ‘i le mālō, ‘ona ‘e fa’apea, ‘e lata ‘i le sefulu tausaga ‘e le’o mulimuli ‘i folafolaga ‘e fa’atatau ‘i totogi talafeagai ma konekarate. 

‘O lo’o ta’imua ai le Kolisi ‘o Fa’atōsaga ‘i lea tagi tu’ufa’atasi, mā ‘o lo’o fīnau a lātou lōia, ‘ua solia ‘e le mālō le aiaiga fa’aletūlāfono ‘o le māliliega, fa’apea ma le Tūlāfono mō Aiā Tatau, ‘ona ‘o le fa’ailoga tagata ‘i le tūlaga ‘o itupā ‘ese’ese.  Peita’i na tā’ua ‘e se lōia ‘a le mālō, ‘e le’o tau’aveina ‘e lea māliliega ni tu’utu’uga fa’aletūlāfono ‘e fa’atatau ‘i totogi ma konekarate, mā ‘e le’o iai se faiga fa’ailoga tagata ‘o tupu ‘i se auala ‘e lē tusa ai ma le tūlāfono.  Na fa’aalia ‘e Robert Kirkness ‘o le College of Midwives, ‘e tatau ‘ona tali le mālō ‘e tusa ai ma le fa’a’umi’umi ‘o le matā’upu ‘i totogi talafeagai ma le lē mulimuli ‘i le māliliega sa faia ‘i ‘auala ‘o le tūlāfono.  Sā faia se folasaga ‘a se lōia mō le Lōia Sili ‘i le aso ananafi, ma fa’atūlaga mai la lātou tali ‘i le matā’upu. 

Link to RNZ (Article) translated by Savelina Kasiano: https://www.rnz.co.nz/news/national/524219/midwives-legal-action-government-must-be-held-to-account-lawyer-says

ATA: RNZ / Rebekah Parsons-King