Su’esu’e ‘e le WorkSafe se tagata faigāluega mai fafo na pa’ū ‘i le gāluega

‘O lo’o su’esu’eina ‘e le WorkSafe le fa’alavelave na pa’ū ai Jun Jiang 37 tausaga le matua mai Jiangsu ‘i Saina, na ‘aumaia ‘e le kamupanī ‘Aukilani’o le SD Aluminium ‘i lalo ‘o le polokalame ‘o visa faigāluega ‘i le 2022. 

‘O le taimi nei, ‘o lo’o fa’alagolago Jiang ‘i masini ‘a le falema’i ‘e mānava ai, talu mai le fa’alavelave.  Na mafai ‘ona malaga mai lona to’alua ma la lā tama ‘e 8 tausaga le matua, ‘i le partner visa.  ‘O le Aso 28 Tēsema, na maua ai ‘e lona to’alua ‘o Jia Fan le telefoni, na ta’u mai ai ‘i ai ‘e se tasi ‘o le ‘aufaigāluega, na pa’ū lona to’alua mai luga ‘o se lifi ‘a’o fa’atino le gāluega.

‘O le ītūlā ‘e 5 ‘i le afiafi ananafi na faia ai le fa’ai’uga ‘a fōma’i ‘i le falema’i ‘i ‘Aukilani ‘e tapē masini ‘o lo’o fa’alagolago ‘i ai le ola ‘o Jiang pei ‘ona fa’amatala ‘e lona to’alua.  ‘Ua fesiligia ‘e Fan, pē na mulimuli le kamupanī ‘i ta’iala mo le puipuiga ‘o le saogalēmū ma le soifua mālōlōina ‘o tagata faigāluega. 

‘O fa’amatalaga na fa’ailoa ‘e le Leitiō Niu Sila ‘e tusa ai ma fa’amaumauga ‘a se ta’avale ‘a le falema’i, ‘e le’i faia se pūlou po’o ni meafaigāluega mō le puipuiga, ‘i le taimi na taunu’u atu ai la lātou ‘au’aunaga.  Na līpotia ‘e se so’o’upu ‘a le St John, ‘e lē mafai ‘ona lātou fa’amaonia au’ili’iliga ‘o fa’amatalaga ‘ae ‘ave ‘uma fa’afesili ‘i le WorkSafe.

Link to RNZ (Article) translated by Savelina Kasiano: https://www.rnz.co.nz/news/chinese/538366/worksafe-investigating-fall-that-has-left-migrant-worker-in-a-coma

Jia Fan, le to’alua ‘o Jun Jiang ma la la tama teine ‘i le falema’i ‘i le Auckland City. Ata: RNZ / Liu Chen