Solia aiā tatau ‘a se tama’ita’i ‘ina ‘ua ‘ave ‘i ai ‘e le Faletalavai ni fuālā’au sesē.

Na solia ma lē mulimulita’ia aiāiga mō le puipuiga ‘o aiā tatau ‘a se tama’ita’i ‘i lalo ‘o le Ta’iala ‘o Aiā Tatau ‘a tagata ‘i le Soifua Mālōlōina ma Mana’oga Fa’apitoa, ‘ona na sesē ni fuāla’au mō togafitiga na tala ‘i ai ‘e se tagata faigāluega ‘i se faletalavai pei ‘ona māua ‘i se su’esu’ega ‘a le Sui Komesina mō le Soifua Mālōlōina ma Mana’oga Fa’apitoa, Dr Vanessa Caldwell. 

Sā tatau ‘ona tala fuālā’au ‘e tā’ua ‘o le Pentasa mō fa’afītāuli ‘o le gastrointestinal ‘o le vāega ma le gāluega ‘a tōtoga ‘o le tino lea ‘e folo ma fa’amalū ai taumafa mā suāvai ma toe pasi ‘ese atu mai le tino ‘ina ‘ua ‘avea ma otaota.  Peita’i na ‘ave ‘i ai ‘i le tama’ita’i ni fuālā’au ‘e tā’ua ‘o le Salazopyrin ma sā inu mō vāiaso ‘e fitu, ma lona manatu ‘o lo’o sui ai lana fuālā’au māsani peita’i na ‘āmata ‘ona fa’alogo atu ‘ua lē mālosi ‘ina ‘ua tuana’i vāiaso ‘e fā talu ‘ona inu lea fuālā’au. 

Na vave lava ‘ona toe mālosi ‘ina ‘ua toe ‘ave atu lana fuālā’au sa’o, ‘o le Pentasa, ‘ina ‘ua alu ‘i ai ‘i le faletalavai ma iloa ai le sesē.  Sā ‘ioe le tagata faigāluega ‘i le faletalavai ‘i lona solia ‘o le Ta’iala pei ‘ona āfāina ai le aiā tatau ‘a le tagata gasegase. Sā fautuaina ‘e le sui komesina le fa’ato’ese āloa’ia ‘o le faletalavai ‘i le tama’ita’i ma ‘ia toe tusi ‘e le faletalavai ta’iala ‘e fa’atino ai ‘i se tūlaga maualuga le ‘avega ‘o fuālā’au ‘a tagata gasegase, ma ‘ia su’esu’eina le aogā ‘o pōlisi fou ma toe līpoti atu ‘i le komesina ‘i fa’ai’uga na maua mai le toe fa’asa’oga ‘o ia sasi.

 Health and Disability Commissioner (Press Release) translated by Savelina Kasiano

ATA: Deputy Health and Disability Commissioner, Dr Vanessa Caldwell – Press Release