Silia ma le 300 leoleo Niu Sila na talosaga ‘e gālulue ‘i Kuiniselani

‘O fuāinūmera fou sa fa’alauiloaina ‘i le vaiaso talu ai ‘e le Stats NZ, sa fa’ailoa ai le 27,000 ‘o tagata ‘ua malaga ‘ese atu ma le atunu’u ma āga’i atu ‘i ‘Ausetālia, pe ‘ā ‘ave’ese le fuāinūmera ‘o tagata na malaga mai ‘i le tausaga talu ai.  ‘O lea fuāinūmera, ‘ua lata ‘ina fa’aluaina le 14,600 lea na malaga atu ‘i Ausetālia ‘i le 2022.  Mā ‘o lo’o aofia ai ma nisi ‘o ‘au’aunaga ‘autū ‘i totonu o Niu Sila, ‘e aofia ai leoleo. 

‘O ni fa’amaumauga sā fa’alauiloaina atu ‘i le TVtasi ‘i le tausaga talu ai, sā iloa ai, ‘e 322 leoleo Niu Sila na talosaga ‘e fia gālulue ‘i le setete lava ia ‘o Kuiniselani.  ‘O Mē 2023, na ‘āmata ai ‘e Leoleo Kuiniselani, se polokalame ‘e sa’ili ai ni a lātou leoleo fou, ‘ae sā fa’atūtū sa’o ‘i leoleo Niu Sila.  Sā aofia ai se pōnesi ‘e $22,000 ‘e sifi atu ai, ma se totogi ‘āmata ‘e tusa ma le $110,000 ‘i le tausaga, fa’aopoopo ‘i ai ma ‘alauni mō fale.   Na fesiligia le Minisitā ‘o Leoleo Mark Mitchell pe to’afia ni leoleo Niu Sila ‘ua maumau atu ‘i Ausetālia.  Na tali Mitchell, ‘e le’o iai ni fuāinūmera manino ‘ae masalo ‘e mai le 50 āga’i  atu ‘i le 100. 

Sā fesiligia fo’i le Komesina ‘o Leoleo Andrew Coster ‘i se fa’au’uga sā faia ‘o leoleo ‘i Ueligitone, ‘ae na ia tali, ‘e le’o iai ni faamaumauga ‘i le taimi nei, ‘e iloa ai se nūmera ‘o ni leoleo ‘ua tu’ua le atunu’u.  Peita’i, ‘i ni fuāinūmera na māua ‘e le 1News, na iloa ai, talu mai le taimi na ‘āmata ai le polokalame, pe ā ma le to’a 322 leoleo Niu Sila na talosaga mō ni avanoa faigāluega ‘i Kuiniselani.  Pe ā ma le to’a 69 leoleo Niu Sila, ‘e ono fa’au’uina ‘iā ‘Oketopa ‘o le tausaga nei, mai se polokalame ‘e 18 vāiaso.  ‘E 138 isi leoleo na talosaga, ‘o lea ‘ua tāpena mō le isi polokalame.  ‘Ua tā’ua fo’i le faitau selau ‘o isi leoleo ‘o lo’o tusi talosaga mō isi setete ‘o ‘Ausetālia.

ATA: Dion Nelson graduating (Source: 1News).