Silia ma le 1.4 piliona tagata malaga fa’avāomālō ‘i le 2024

by | Jan 24, 2025 | Niu Sila

‘Ua fa’alauiloa ‘e le UNWTO, po’o le fa’alāpotopotoga ‘a Mālō ‘Aufa’atasi mō tūrisi ‘i le lalolagi a lātou fa’amaumauga ‘e fa’amaonia ai ‘ua toe fo’i lava ‘i le tūlaga ‘ae le’i tupu le kōviti, le to’atele lea ‘o tagata fēmalāgāa’i. 

‘E tusa ma le to’a 1.4 piliona le aofa’iga ‘o tagata na malaga ‘i le vā ‘o mālō ‘i le tausaga talu ai, pe tusa ma le 99 pasene ‘o le fuainūmera lea na feoa’i ‘iā lātou malaga ‘i le tausaga ‘e 2019, ‘a’o le’i a’afia le lalolagi ‘i le kōviti.  ‘E tusa lea ma le 1.9 turiliona tālā ‘Amerika na fa’aaluina ‘i pisinisi ‘o tagata tāfafao.

‘O ‘Europa le konetineta na pito sili ‘ona to’atele tagata ‘e asiasi ‘i ai, ‘e 747 miliona tūrisi ‘i le 2024.  ‘O Falani le atunu’u na pito sili ‘ona to’atele ‘e asiasi ‘i ai ‘i le 2024, lea ‘e tusa ma le to’a 100 miliona tūrisi.  Sēpānia ‘e 98 miliona tūrisi na āsia lea atunu’u. 

‘E 316 miliona tagata na malaga ‘i ‘Āsia ma le Pasefika ‘i le 2024, 213 miliona na malaga ‘i le atu ‘Amerika, 95 miliona tūrisi na malaga ‘i Sasa’e Tūtotonu ma le 74 miliona ‘i ‘Aferika.

Link to RNZ (Article) translated by Savelina Kasiano: https://www.rnz.co.nz/news/world/539792/more-than-1-point-4-billion-people-travelled-internationally-in-2024-as-tourism-returns-to-pre-pandemic-highs

ATA: Sāmoa Capital Radio (file).