Silia ‘i le 8000 fale fou ‘o le ‘ā fa’anatinati ‘ona fausia ‘i Uēligitone

‘E sili atu ‘i le 8000 le aofa’iga ‘o ni fale fou ‘ua pāsia le fausia fa’anatinati ‘i lalo ‘o polokalame ‘a le Mālō ‘i nisi ‘o pitonu’u ‘o le laumua ‘i Uēligitone, peitai, ‘e fa’alētonu pea le tūlaga, ma lē mautū se fuafuaga  mō ‘auala ‘o fela’ua’iga mō Uēligitone ma lona itūmālō.

Na fa’ailoa mai ‘e se sui ‘o le Pūlega fa’aitūmālō ‘o Uēligitone, ‘o le musu ‘o le Mālō ‘e ‘āuai ‘i se polokalame ‘e fa’afou ai ma tausia ‘auala nei ‘o fela’ua’iga, ‘o le ‘ā āfāina ai lana polokalame lenei mō fale fou ‘o lo’o fia fausia ‘e mautotogi ai tagata.

Na tā’ua ‘e fa’apea, ‘o le ‘amataga ‘o le tausaga nei, na tē’ena ai ‘e le faigāmālō se talosaga mai le Pūlega fa’a-itūmālō ‘o Uēligitone mō le fa’atupeina ‘o le aofa’iga ‘e $134-miliona Tālā ‘o le tau ‘ātoa ‘e $270-miliona, ‘o lea polokalame ‘i totonu ‘o le isi tolu tausaga ‘o lumana’i nei.

Na tā’ua ‘e le sui lenei ‘o le Pūlega, ‘o Thomas Nash, ‘o le tē’ena ai ‘e le Mālō ‘o lea talosaga, ‘o le ‘ā lē mafai ai ‘ona faia nisi ‘o gāluega ‘i le fa’aleleia ma le tausia ‘o ‘āseta ‘autū mō le fa’atinoina ‘o ‘au’aunaga tau fela’ua’iga pei ‘ona mana’omia.

Na ia tā’ua ‘o le kamupanī ‘a le KiwiRail lātou te fa’atupeina ‘auala u’amea ‘ātoa ma nofoāafi ‘e feoa’i ai, ‘a’o le regional council po’o le pūlega ‘o lātou ia ‘e fa’atupeina isi vāega ‘e aofia ai nofoaga ‘e fa’atali ai pāsese po’o stations, ‘ātoa ma fa’amatalaga  ma feso’ota’iga ‘ae fa’apea gāluega ‘i le fa’atonutonuina ‘o le feoa’iga ‘o trains.

Peita’i, ‘ua ‘uma ‘ona fa’ailoa mai ‘e le Minisitā ‘o ‘Auala ‘o Fela’ua’iga, ‘iā Simeon Brown, ‘ua tatau ‘i pūlega nei fa’aitūmālō, ‘ona fuafua lelei a lātou gāluega ‘i sēleni ia ‘ua ‘uma ‘ona pāsia ‘e le mālō.

Na ia tā’ua ‘o le Polokalame ‘o ‘Auala ‘o Fela’ua’iga ‘a le Mālō, ‘ua fa’amatu’u atu ai mō Uēligitone le aofa’iga ‘e $1.3-Piliona Tālā, mā ‘e tatau ‘i le pūlega ‘ona fuafua ‘i ai le fa’atinoina ‘o ana gāluega fai.

Link to RNZ (article) translated by Lauano Ilaoa:https://www.rnz.co.nz/news/national/532148/wellington-housing-fast-tracked-but-rail-infrastructure-lags-behind

Ata: The government has declined to fund any of the station improvements for the Paraparaumu, Waterloo or Woburn stations. RNZ.