Silia ‘i le 400 tagata faigāluega ‘ua fa’amāvae ‘o le Matāgāluega ‘o le Soifua Mālōlōina

‘Ua talia ‘e le Matāgāluega ‘o le Soifua Mālōlōina, le silia ‘i le 400 ‘o talosaga ‘a ana tagata faigāluega ‘ua mānana’o ‘e mālōlō ‘i lo lātou lava loto malie (voluntary redundancy).

‘O le māsina ‘o ‘Aukuso, lea sā  fa’ailoa ai ‘e lea matāgāluega ‘i ana tagata faigāluega lenei tūlaga, ‘i se vāega ‘o ana taumafaiga ‘e fa’aitīitia tupe fa’aalu ‘i le fa’atinoga ‘o ana ‘au’aunaga ma gāluega fai.

Na fa’ailoa mai ‘e le Fa’atonu Aoao ‘o le matāgāluega, ‘iā Fepulea’i Margie Apa, ‘o lo’o fa’aauau ‘i le taimi nei ‘ona fa’avasega ia talosaga mai le ‘aufaigāluega ‘ua mānana’o ‘e mālōlō mai o lātou tofiga.

Na ia tā’ua, ‘e lē’o talia ‘e le matāgāluega le a’afia ‘i lenei tūlaga, ‘o le ‘aufaigāluega mō le togafitia ‘o gasegase, le front-line clinical staff.

‘Ae pei ‘e fa’apitoa lenei fuafuaga mō se vāega ‘o tagata ‘e gālulue ‘i vāega ‘e pei ‘o le pūlega, ‘ae fa’apea le ‘au faufautua ‘i faiga fa’avae ‘ātoa ma nisi ‘o tūlāgā tofi fa’apitoa.

‘Ua ‘uma ‘ona fa’ailoa mai ‘e le vasega ‘o fōma’i (Junior Doctors), ‘o le lēai ‘o se ‘aufaigāluega lagolago tau le pūlega, ‘e āfāina ai le tausiga ma le togafitiga ‘o gasegase.

Link to RNZ (Article) translated by Lauano Ilaoa: https://www.rnz.co.nz/news/national/531411/health-nz-accepts-more-than-400-voluntary-redundancies

ATA: Unsplash / RNZ