Silia ‘i le 24 ītūlā ‘o fa’atalitali ma’i mō se fōma’i ‘i le E.D. ‘a Uēligitone

Lipotia mai le sili atu ‘i le 24 ītūlā ‘o fa’atalitali gasegase mō se fōma’i, ‘i le Vāega mō Fa’alavelave Fa’afuase’i, po’o le Emergency Department ‘i le Falema’i Tele ‘o Uēligitone, ‘i le māsina lenei ‘o ‘Aukuso ‘ua fa’ai’ui’u.

‘O le molimau ‘a se tausi soifua sā tiute ai ‘i le ED ‘a Uēligitone ‘i le sifi po’o se Aso Gafua lata mai nei, na ia tā’ua ai, ‘e iai se ali’i ‘e 12 ītūlā ‘o fa’atalitali ‘e fia va’ai se fōma’i, ma na i’u ‘ina moe ma pa’ū ai ‘i lalo ma manu’a ona fōliga, ‘i le potu fa’atalitali.

‘Ua fa’aalia mai ai ‘e le Minisitā ‘o le Soifua Mālōlōina, ‘o Simeon Brown, ‘e matuā le talafeagai le tūlaga ‘o lo’o iai nei le vāega lea ‘e taunu’u ‘i ai gasegase ma tagata ‘e a’afia ‘i ni fa’alavelave fa’afuase’i ‘i le falema’i tele ‘o Uēligitone lea ‘ua mātauina, ‘o se tasi lenei ‘o falema’i aupito ‘i leaga ma fa’alētonu le ‘au’aunaga ‘i le vāega fa’apitoa lenei le Emergency Department.

Sā tā’ua ‘e le Minisitā, ‘o Uēligitone, se tasi ‘o falema’i, ‘o lo’o iloga ‘ona āfāina la lātou ‘au’aunaga, ‘ona ‘o le to’atele ‘o tagata ‘o lo’o sulufa’i atu ‘i ai ‘ona ‘o a’afiaga ‘i fa’ama’i māsani ‘o le tau mālūlū, ‘ae fa’apea ai ma isi fa’ama’i pipisi.

  ‘O le tausi soifua sā līpotia lenei fa’alētonu, ’o se sui ‘o le ‘Asosi ‘a Tausi Soifua ‘o Niu Sila, le NZNO, mā ‘o lo’o taofia le fa’ailoaina fa’alaua’itele ‘o lona igoa.

‘Ae na tā’ua ai ‘e fa’apea ‘o le sifi pō lea ‘i le Aso Gafua 17 ‘o ‘Aukuso sā tiute ai, ‘e tele taimi na se’e ai ‘i le Code Red ‘ia le tūlaga ‘o le ‘au’aunaga ’ona o le tūlaga pisi ma le to’atele ‘o tagata na sulufa’i atu ‘i ai.

Na fa’ailoa mai ‘e le Matāgāluega ‘o le Soifua Mālōlōina, ‘e fa’apea, ‘o le Code Red, ‘e fa’amamalu ‘i le taimi ‘e iloga ‘ona matuā pisi ai ma tele le mau fa’afītāuli ‘e feagai ma le ‘au’aunaga mai lea taimi ‘i lea taimi.

‘E fa’avae ia tūlaga ‘i le tumutumu ‘o le potu fa’atalitali, ‘aemaise ‘o le tūlaga ‘o le tomai ma agava’a ‘o le ‘aufaigāluega, fa’apea le fesuia’iga ‘o ītūlā ma taimi ‘o togafitiga, ‘ātoa ai ma le tūlaga tīgāina ‘e iai ma’i ma gasegase ‘e fia maua se fesoasoani.

Sā tā’ua ai ‘e fa’apea ‘e iai le tagata na o’o atu ‘i le ED ‘e fia va’ai se fōma’i ‘i le afiafi ‘o le Aso Gafua lea 17 ‘o ‘Aukuso, ma ‘uma lelei le pō ‘o fa’atalitali, fa’ato’ā maua le avanoa ‘e va’ai ai le fōma’i ‘i le ītūlā ‘e 6 ‘i le taeao na soso’o ai, ‘ae na māfua ‘ona vave maua lona avanoa, ‘ona ‘o manu’aga ‘ina ‘ua pa’ū ‘i le fola ‘o le fale ‘a’o fa’atalitali ‘ina ‘ua moe.

Sā tā’ua ai ‘e le tausi soifua lenei, ‘o le māsina lenei, sā iloga ai ‘ona ‘u’umi taimi fa’atalitali ‘o tagata ‘i le ED sā iai taimi na o’o atu lava ‘i le 24 itula, ‘ae ‘o le taimi ‘umi lava ‘e māsani ai, ‘o le 18 ītūlā.

‘O le līpoti āloa’ia ‘a le matāgāluega ‘a le soifua mālōlōina na tā’ua ai, ‘o le māfua’aga ‘autū ‘o lenei fa’alētonu ‘ona ‘o le lē lava ‘o moega ‘i totonu ‘o le falema’i.

‘Ae ‘o le tūlaga mana’omia mō falema’i ‘uma ‘i totonu ‘o le atunu’u, ‘e tatau ‘ona o’o le 95 pasene ‘o gasegase ‘uma ‘e o’o atu ‘i le Emergency Department, ‘e tatau ‘ona va’aia ma taofia pē toe tēte’a ‘i tua, ‘i totonu ‘o le taimi ‘e 6 ītūlā talu ‘ona taunu’u atu ‘i ai.

Peita’i lā, ‘o fa’amaumauga ‘a le Matāgāluega ‘o le Soifua Mālōlōina mō Ianuari se’ia o’o mai ‘iāMati ‘o le tausaga lenei, 2026, ‘o lo’o manino ai, sā nā ’o le 57.6 pasene ‘o lea aofa’iga sā mafai ‘ona fa’atino ‘e le Falema’i Tele ‘o Uēligitone ma isi falema’i ‘uma ‘i totonu ‘o le itūmālō ‘o le Capital & Coast.

Link to RNZ (Article): https://www.rnz.co.nz/news/health/1175563/some-patients-face-24-hour-wait-at-wellington-hospital-emergency-department

IMAGE/ATA: RNZ.