Sili atu ‘i le ‘afa ‘o polokalame sā folafola ‘e le mālō Niu Sila ‘ua tuai ma ono lē ‘uma

‘E sili atu ‘i le ‘afa ‘o gāluega tetele ma polokalame ia sā folafola ‘e le faigāmālō so’ofa’atasi ‘ina ‘ua tūla’i mai, ‘ā lē tuai, ‘e ono lē ‘uma ‘ona fa’atino, ‘e tusa ai ‘o fa’amaumauga aupito lalata mai.  ‘O lea ‘ua si’itia maualuga le aofa’iga ‘o tagata ‘o lo’o maua le penefiti su’e gāluega, le Job Seeker benefit, ‘ae feagai ma fa’afītāuli le polokalame lea na sui ‘e tau fa’aleleia ai le maualalo ‘o le aofa’iga ‘o tamaiti ‘e pasi ‘i le matā’upu ‘o le matematika ma le ono lē ‘ausia ‘o le fuainūmera sā mua’i fuafuaina.

‘Ua fa’alauaitele mai ‘e le Uaeālesi Fa’asalalau ‘a Niu Sila, ni ata ‘e mafai ‘ona au’ili’ili ai le gāsologa ‘o gāluega tetele ‘uma nei ma polokalame fa’ata’atitia ‘e iva ‘a le faigāmālō, ‘e fa’aaogā ‘i ai fuainūmera ma fa’amaumauga āloa’ia ‘e tu’uina mai ‘e le Mālō, ‘ina ‘ia mafai ‘ona fuafua ‘i ai le ‘uma ‘a le tūlaga ‘ua o’o ‘i ai ia ātīna’e.  ‘O le fa’amoemoe, ‘ina ‘ia mafai ‘ona fa’afou ia fuainūmera ‘i māsina ta’itolu ‘uma, ‘o fa’amaumauga aupito lata mai nei, ‘e mō le tolu māsina mai ‘iā Iūlai ‘e o’o mai ‘iā Sētema ‘o le tausaga nei 2024.

‘O polokalame fa’alea’oa’oga ‘ātoa ai ma fuainūmera mō tagata ‘i le penefiti su’e gāluega, ‘ua iai nei ‘i se tūlaga lē manuia, ‘ae ‘ese ai isi polokalame ‘e tolu ‘i le itū tau ‘i le soifua mālōlōina ma fuainūmera mō soligātūlāfono, ‘o lo’o tuai ‘ona o’o ‘i se tūlaga lelei mā ‘e ono lē mafai ‘ona ‘ausia, mā ‘e fa’apēnā fo’i ‘ona fa’alētonu isi polokalame ‘e aofia ai le fa’aitīitia lea ‘o tagata ‘o lo’o nonofo ‘i fale lē tūmau ia ‘e tā’ua ‘o emergency housing, ‘ae fa’apea ma le polokalame ‘e fa’aitīitia ai kasa ‘o’ona ‘e masua ‘i le si’osi’omaga.

Link to RNZ (Article) translated by Lauano Ati Ilaoa: https://www.rnz.co.nz/news/political/536046/the-government-s-targets-in-charts-more-than-half-behind-track

ATA: RNZ