Si’itia le nūmera ‘o le ‘au lēai ni gāluega: Pito sili ‘ona mafatia tupulaga talavou

‘Ua fa’aalia ‘i fa’amaumauga fou mō tagata ‘e lēai ni gāluega, le 33,000 fa’aopoopo ‘o isi tagata Niu Sila ‘e lēai ni gāluega fa’atusatusa ‘i le taimi lenei ‘i le tausaga talu ai, ma ‘ua ‘ātoa ‘i ai le to’a 143,000. 

‘E 4.6 pasene na si’itia ai le fuainūmera ‘i totonu ‘o māsina ‘e tolu ‘e o’o mai ‘i le fa’ai’uga ‘o Iuni, mai le 4.4 pasene sa iai ‘i le isi tolu māsina muamua atu.  ‘O fa’amaumauga na fa’alauiloaina ‘i le Aso Lulu, ‘ua iloa ai, ‘e lata ‘i le ‘afa ‘o le fuainūmera fou ‘o tagata ‘e lēai ni gāluega, ‘o ē ‘i le vā ‘o le ta’i 15 ma le ta’i 24 tausaga le mātutua, mā ‘o le to’atele fo’i ‘o ‘i lātou, ‘e manana’o ‘i nisi gāluega, peita’i ‘e lē maua ni ītūlā.  Na fa’aalia ‘e se tasi ‘e galue mō tupulaga, ‘o le to’atele ‘o talavou ‘o lo’o taumafai ‘e sa’ili ni gāluega peita’i ‘e matuā faigatā lava mā ‘o ia fo’i faigatā, ‘o lo’o a’afia ai ma le to’atele ‘i lagona ‘o le lēai ‘o se fa’amoemoe.  ‘O lo’o iai le manatu ‘e ‘augatatā tupulaga ‘e faigāluega peita’i, ‘o le mea moni, ‘o lo’o taumafai ‘e sa’ili ni a lātou gāluega pei ‘ona tā’ua e Aaron Hendry ‘o le fa’alāpotopotoga ‘o le Kick Back, ‘i luga ‘o le Checkpoint.  ‘O le mau ‘a le fai tōfā ‘o le Kiwi Bank, Jarrod Kerr, ‘e ono fa’aopoopo le fuainūmera ‘o tagata ‘e lēai ni gāluega ‘i nai māsina ‘o lumana’i nei.  ‘O lo’o iai le talitonuga, ‘e o’o atu ‘i le fa’ai’uga ‘o le 2024, ‘ua si’itia atu ‘i le 5 pasene le nūmera ‘o tagata ‘e lēai ni gāluega.

Link to RNZ (Article) translated by Savelina Kasiano: https://www.rnz.co.nz/news/national/524451/unemployment-rate-soars-young-people-bearing-brutal-brunt-of-job-crisis

ATA: Sāmoa Capital Radio (file).