Si’itia la’ititi le aofa’iga ‘o ma’i fou ‘o’le Kōviti-19

Na si’itia la’ititi le aofa’iga ‘o ma’i fou ‘o le Kōviti-19 sā fa’amauina ‘i Niu Sila ‘i le vāiaso ‘ua tuana’i atu nei fa’atusa ‘i le vāiaso ‘i ona tua, ma ‘ua  fa’ailoa mai fo’i ‘e le Matāgāluega ‘o le Soifua Mālōlōina, ‘o le vairusi fou ‘o le XEC lea ‘ua sui ‘i ai le isi itū’āiga ‘o vairusi ‘o lenei fa’ama’i ‘i totonu ‘o Niu Sila nei.

‘E 917 le aofa’iga ‘o ma’i fou, ‘ae lima le aofa’iga ‘o maliu sā fa’amauina ‘i le vāiaso lea na fa’a’uma ‘i le vaeluaga ‘o le pō ‘o le Aso Sā.  ‘O le vāiaso ‘i ona tua, sā fa’amauina ai le aofa’iga ‘e 886 ‘o ma’i fou, ‘ae ono le aofa’iga ‘o maliu.  ‘E 124 le aofa’iga ‘o tagata sā taofia ai ‘i falema’i mō togafitiga.

‘O le itū’āiga fou ‘o le vairusi lea ‘e fa’aigoaina ‘o le XEC, na mua’i maua ‘i totonu ‘o le atunu’u ‘o Siāmani ‘i le māsina ‘o ‘Aukuso, ma ‘ua iloga ‘ona mālosi le salalau ma le pipisi atu ‘i isi vāega ‘o le lalolagi ‘i le taimi nei.

‘E lēai ā se ‘ese’esega tele ma vairusi sā iai muamua ‘o le Kōviti-19, ‘ae māfua mai ‘i le taimi ‘e maua ma a’afia ai se tagata ‘i ni variants se lua ‘o le vairusi ‘o le kōviti.

Link to RNZ (Article) translated by Lauano Ilaoa:https://www.rnz.co.nz/news/national/531449/covid-19-update-917-new-cases-five-further-deaths

ATA: 123rf.com / Composite Image – RNZ