Si’itia aofa’iga ‘o tagata ‘i le penefiti ‘iā Mē 2025

‘E 27,243 le aofa’iga ‘o isi tagata ‘ua fa’aopoopo atu ‘i le lisi ‘o lātou ‘o lo’o maua le penefiti ‘a le mālō Niu Sila, ‘i le māsina na tuana’i atu nei ‘o Mē.

‘O fa’amaumauga fa’alemāsina ‘a le Matāgāluega ‘o le Ātīna’e Lautele, le MSD, Ministry of Social Development, na iloa ai na si’itia ‘i le fitu (7) pasene le aofa’iga ‘o tagata sa o lātou maua le fesoasoani lenei ‘o le penefiti mai le mālō ‘i le māsina ‘o Mē, ‘o le aofa’iga ‘ātoa, ‘e pei ‘ona fa’ailoa mai, ‘e 403,311.

Sā fa’ailoa mai fo’i ‘e fa’apea, ‘o le fua ‘o le aofa’iga ‘o tagata ‘e lēai ni gāluega mō le māsina ‘ua mavae ‘e 5.1 pasene.

Na tā’ua ‘e fa’apea, ‘o le māfua’aga ‘o lenei si’itaga, ‘ona ‘o le to’atele ‘o tagata sā tu’uina atu ‘i ai le penefiti su’e gāluega, le Job Seeker benefit, lea na si’itia ‘i le 11 pasene, po’o le aofa’iga ‘e 21,000 lea ‘ua o’o ai ‘i le 213,831 le aofa’iga ‘ātoa.

‘O le māsina ‘o Mē, ‘e 9.5 pasene na si’itia ai le aofa’iga ‘o tagata na maua gāluega ‘e faigāluega tūmau ai, ‘e fa’atusa lea ‘i le tausaga ‘ua mavae, ‘ae valu pasene le aofa’iga ‘o penefiti na tāofi ma fa’amuta ai pe ‘ā fa’atusa ‘i le tausaga ‘ua mavae, ‘ona ‘o māfua’aga ‘e aofia ai le fa’amamaluina ‘o tu’utu’uga ma ni aiaiga fou ‘a le matāgāluega, ‘o se aofa’iga ‘e sili atu ‘i le 6,000 tagata na a’afia ai.

‘Ua ‘uma ‘ona fa’ailoa mai le fa’amoemoe ‘o le faigāmālō so’ofaatasi, ‘ina ‘ia o’o atu ‘i le tausaga ‘e 2030, ‘ua tatau ‘ona fa’aitīitia ‘i le 50,000 afe le aofa’iga ‘o tagata lātou te maua le penefiti su’e gāluega, ‘e ‘auala lea ‘i le fa’aaogāina ‘o se faiga fou ‘e talosagaina ai lea fesoasoani pei ‘ona ‘ua fa’aitīitia ai mai le tausaga ‘i le nā ‘o le ono māsina le taimi ‘e tatau ‘ona talosaga ai le fa’afouina ‘o lea itū’āiga ‘o penefiti.

Link to RNZ (Article) translated: https://www.rnz.co.nz/news/national/564157/more-claim-social-development-benefits-during-may

ATA: SCR (file).