Saunoaga ‘a le Palemia Christopher Luxon ‘i fa’amoemoega ‘o le mālō ‘e fa’atāolaola ai le tamāo’āiga

‘O inivesi ‘i atunu’u ‘i fafo, ‘o tamaiti ā’oga mai fafo fa’apea ma tūrisi, ‘o vāega ia ‘e tolu ‘ua fa’avavevave ‘ona ‘ave ‘i ai le fa’amuamua ‘a le Palemia Christopher Luxon ‘e toe fa’atāolaola ai le tamāo’āiga.
‘E lona fā ‘i le ‘ave’esea ‘o tapula’a ‘i le nūmera ‘o koneseti ‘e fa’ataga ‘i le malae ‘o le Eden Park ‘i ‘Aukilani, ‘ina ‘ia ‘aua ne’i toe malaga mamao tagata Niu Sila ‘i ‘Ausetālia ‘e matamata ‘i fa’afiafiaga ‘a fa’aili ‘e fiafia ‘i ai.
‘O ananafi lea na faia ai le saunoaga ‘o le State of the Nation Speech ‘a le Palemia ma ‘o sana saunoaga muamua ‘o lenei tausaga ma sa fa’ailoa ai fa’amoemoega ‘o le faigāmālō ‘i le fa’atāolaolaga ‘o le tamāo’āiga ‘o le atunu’u.
‘Ua finagalo le mālō ‘e ‘āmata se lālā fou, ‘e ta’ua ‘o le Invest New Zealand. ‘E le’o manino au’ili’iliga pe fa’apēfea ‘ona fa’atōsina mai ai ‘inivesi ‘i le lumana’i.
‘E fōliga faigōfie ‘ona maua fa’amanuiaga mai tamaiti ā’oga fa’avāomālō ma tagata tāfafao mai fafo peita’i, ‘e ao ona fa’atino gāluega tetele ‘e pei ‘o auala ‘ina ‘ia mafai ‘ona gafatia le lolofi mai ‘o tagata tāfafao pei ‘ona fa’aalia. Na fa’aleo se finagalo ‘o le pulenu’u ‘o Queenstown ‘i vāega ‘e le’o ‘āto’atoa ai lea fuafuaga. Na saunoa Luxon ‘i le Leitiō Niu Sila, ‘o le tausaga talu ai lea na fa’asilasila ai se fuafuaga mō ‘auala tetele ‘i Queenstown ma maliliega ma isi itūmālō, ‘e mafai ai ‘e pūlēgānu’u ‘ona gālulue fa’atasi ‘e fesoasoani ‘ia vave ‘ona fa’atāolaola la lātou itūmālō.
‘O le tele ‘o taimi ‘o le saunoaga ‘a le palemia, sa ia talanoa ai ‘i le tūlaga mo’omia mō le to’atele ‘i Niu Sila ‘ina ‘ia fa’amāsani ‘i le ‘ioe, ‘ae fa’alagolago ‘i le a’oa’o mai ni mea sesē na faia ‘i le taimi ‘ua tuana’i ‘ae lē ‘o le toe fo’i ‘i ai.
Link to RNZ (Article) translated by Savelina Kasiano: https://www.rnz.co.nz/news/top/539780/something-old-new-borrowed-and-blue-in-pm-s-growth-plan
ATA: RNZ / Marika Khabazi