Saunoa David Seymour ‘i le fonotaga ‘a ‘Asosi ‘o Ā’oga Fa’ata’ita’i

‘O le aso ananafi na faia ai se koneferenisi ‘a le fa’alāpotopotoga ‘o ā’oga fa’ata’ita’i le Kindergartens Aotearoa. ‘O le ‘auga ‘o lea fonotaga, ina ‘ia malamalama ‘i mea ‘o lo’o ‘ave ‘iai le fa’amuamua ‘a le faigāmālō mo Āʻoaoga fa’ata’ita’i, ma le aʻafiaga ‘i ā’oga faʻataʻitaʻi mai ‘i suiga ‘o pōlisi ‘a le mālō.

Fa’apea le talanoaina ‘o le fa’atūlagaga ‘o polokalame mō ā’oga fa’ata’ita’i, ‘e tusa ai ma manulautī ‘a le faigāmālō so’ofa’atasi. Sā ‘auai le tele ‘o fa’alapotopotoga ‘o ā’oga fa’ata’ita’i ‘e iai le Whanau Manaaki, Kaitiaki Kindergartens, Kids First, Taranaki, Tauranga, Napier ma isi. Na tatala aloa’ia le fonotaga ‘i le karakia ‘a Māori tāpenaina ‘e Jessica Firmin, na soso’o lea ma le saunoaga ‘a le Minisitā mō teuteuga ‘o Tūlafono David Seymour. Sa fa’alau’a’itele le saunoaga ‘a Seymour ‘i fuafuaga ‘a le mālō mo ā’oga fa’ata’ita’i. Na fa’amaonia ‘e Seymour ‘o le ‘ā lē fa’aitiitia le fa’atupega ‘o ‘au’aunaga mō a’oa’oga fa’ata’ita’i. Sa fesiligia Seymour po’o ā fuafuaga ‘a le mālō, a’o lana va’ai mamao ‘e fa’atatau ‘i alafua ma le lagolago mo alo ma fānau ‘e maua ‘i le Autism, ADHD ma isi tamaiti ‘e iai isi mālosi’aga ‘o māfaufau. ‘E le’i mautonu le tali ‘a le Minisitā, ‘e uiga ‘i lea matā’upu. Sa maua le taimi ‘e fa’asoa ai Shamubeel Eaqub, ‘o sē tasi ‘o le ‘au fai tōfā ‘o le tamāoa’iga, ‘i a’afiaga ‘o a’oa’oga fa’ata’ita’i mai ‘i suiga ‘a le mālō. Na fa’amanino ‘e Shamubeel nisi ‘o a’afiaga ‘e ono feagai ma ā’iga ‘o tamaiti ‘e ‘i a’oa’oga fa’ata’ita’i, pe ‘ā fa’amaonia nisi ‘o fesuia’iga ma fuafuaga ‘a le mālō.

ATA: David Seymour / FB.