Sāuni Uēligitone ‘i si’itaga ‘o pili ‘eletise

‘E lata ‘i le 30 pasene ‘ua fuafua le Wellington Electricity ‘e si’itia ai tau mō laina ‘eletise ‘i Uēligitone ‘i tausaga ia ‘o lumana’i nei.  Na fa’aalia ‘e le kamupanī, ‘ua fai si leva ma tuai ‘o masini ma gāluega tetele ‘o lo’o fa’agaioi ai le ‘au’aunaga, ma ‘ua fa’ase’e ‘ese fo’i mai le fa’aaogāga ‘o le kesi, fa’atasi ai ma le fa’atuputupula’ia pea ‘o afā ma matagi, ‘ua fa’amamafa ‘avega ai ‘i meafaigāluega ‘o lo’o fa’atino ai le gāluega. 

Na tā’ua ‘e le Consumer NZ, ‘o se fuafuaga ‘o le ‘ā matuā ‘avega mamafa lava mō ‘āiga ‘a’o lea ‘ua leva ‘ona tau fa’asao le ‘eletise ‘ona ‘o le faigatā ‘o le totogiga ‘o pili ma le tau ‘o le soifuaga.

Na fa’aalia ‘e le pule sili ‘o le Wellington Electricity Greg Skelton, ‘e ‘āmata atu ‘i le tausaga ‘e 2028, ‘o le ‘ā ‘i le vā ‘o le $144 ma le $168 le tau fa’aopoopo mō le tausaga, fa’aopoopo ‘i le $600 fa’aletausaga ‘o lo’o totogi ‘e tagata Uēligitone ‘i pili ‘o le ‘eletise, pe tusa lea ma le $12 i le $14 fa’aopoopo ‘i le māsina.  Na fa’aalia ‘e Skelton, ‘e mo’omia ‘e le kamupanī le fa’aalu ‘o le $1 piliona ‘i le isi 15 tausaga ‘o lumana’i.

‘E ta’i lima tausaga ma fa’atūlaga tau ‘o le tosoga ‘o laina ‘eletise ma ‘e fa’atūlāfonoina ‘e le Kōmisi mō Pisinisi.  ‘Ua sāuni le kamupanī ‘e talosaga ‘i le komisi ‘ina ‘ia fa’ataga le kamupanī ‘e si’i a lātou tau, ma ‘ua ‘āmata fa’atalanoa fo’i tagata Uēligitone.  Na fa’aalia ‘e Skelton, ‘e 65,000 ‘āiga ‘o lo’o fa’aaogāina pea le kesi, peita’i ‘e iai le talitonuga ‘e le’o toe mamao ‘ae sui, ‘o le ‘ā tele ‘aveta’avale ‘e fa’atau ta’avale ‘eletise ma ‘āiga ‘o le ‘ā fa’apipi’i solar panels, po’o vāega ‘e maua ai le ‘eletise mai le lā.

Link to RNZ (Article): https://www.rnz.co.nz/news/regions/1653642/electricity-bills-set-to-increase-for-wellingtonians

IMAGE/ATA: RNZ / Baz Macdonald