Sā’iliga ‘o tagata ‘e lē totōgia lāfoga

‘Ua folafola ‘e le ‘Ōfisa ‘o Lāfoga, ‘o le ‘ā fa’aaogā le 29 miliona tālā fa’aopoopo ‘i lana pāketi, ‘e sa’ili ai le ‘au fai lāfoga ‘e le’o fa’amalieina o lātou tiute ‘e tatau ‘ona fa’atinoina.  ‘Ua fa’ailoa ‘i fa’amaumauga, ‘e o’o mai ‘i le taimi nei, ‘o lo’o mamao atu a lātou fa’atinoga nai lō matāti’a fia ‘ausia.

‘O lo’o fuafua fo’i le ‘ōfisa, ‘ina ‘ia maua se isi 63 miliona tālā fa’aopoopo ‘i tupe maua mō le tausaga fa’alelāfoga ‘o lo’o iai nei, ‘i se aofa’iga ‘e $1.038 piliona.  Sā si’itia maualuga fo’i le tīnoi tupe na aoina mai ‘aitālafu ‘ua te’a mamao le taimi sā tatau ‘ona totogi ai.

‘E $1.213 piliona na aoina ‘i totonu ‘o māsina ‘e tolu, fa’atusatusa ‘i le $914.3 miliona ‘i le tausaga ‘i tua atu.  ‘O tagata ‘o lo’o aumau ‘i fafo ‘o lo’o iai a lātou ‘aitālafu, ‘e lata ‘i le 20 miliona tālā le tupe na maualuga atu ai le aofa’iga na o lātou totogiina ma le loto malie ‘i le tausaga ‘ua tuana’i atu.

Na fa’aalia ‘e le ‘ōfisa, ‘o le to’atele lava ‘o tagata ‘o lo’o sa’o le fa’atinoga ‘o le totōgiga ‘o lāfoga.  ‘I le vā ‘o Iūlai ma Sētema, ‘e 97 pasene ‘o līpoti ‘o fa’amaumauga ‘o lāfoga na fa’ao’o atu ‘i totonu ‘o le taimi ‘e tatau ‘ona fa’ao’o atu ai ma le 96 pasene ‘o lāfoga na aoina, sā mafai ‘ona totogiina atu ‘i le taimi fa’atūlagaina.

Link to RNZ (Article) translated by Savelina Kasiano: https://www.rnz.co.nz/news/business/538402/how-the-tax-crackdown-is-working

Ata: RNZ