Pusa ‘aisa ‘e $920, ‘uma ane ‘ua $10,000 le ‘aitālāfu
‘Ua fa’aleo se lapata’iga ‘a le Polokalame ‘a le ‘Ōfisa ‘o Sulufa’iga mō matā’upu ‘i ‘Inisiua ma ‘au’aunaga tau tupe, ‘ona ‘o le matā’upu ‘i se tinā na fa’atau sana pusa’aisa ‘e $920, peita’i ‘e uma ane, ‘ua o’o ‘i le $10,000 lana ‘aitālāfu.
Na su’esu’eina talu ai nei ‘e lea polokalae le matā’upu ‘a le tinā, mā ‘e le’o fa’ailoaina tagata na fa’aseā po’o fa’alāpotopotoga ‘o lo’o tu’ua’ia ‘i le matā’upu. Sā mo’omia ‘e le tinā se pusa’aisa fou, ‘ona ofo lea ‘i ai ‘e le fale’oloa ‘o se pepa fa’a’aitālāfu ‘e fa’atau ai, ma sā iai se pāleni ‘e fa’a’aitālāfu ‘e $6000. Na fa’aaogā ‘e le tinā le pepa ‘e fa’atau ai ma isi ‘oloa, ‘ae ‘uma ane, ‘ua faigatā ‘ona tau togitogi le ‘aitālāfu, ‘ona fautua lea ‘iai ‘o le fale’oloa po’o le pisinisi na aveatu ai le pepa mō fa’atauga fa’a’aitālāfu, ‘e fai sana nonōgātupe ‘e totogi ‘ātoa ai.
Peita’i na fa’amāvae le tinā ma lana gāluega ‘ona ‘o ni fa’afītāuli ‘i lona soifua mālōlōina, na ātili ai ‘ona feagai ma fa’afitāuli tau tupe, mā na te le’i fa’aaogāina le nonōgātupe ‘e $6378.75, ‘e totogi ‘ātoa ai le ‘aitālāfu ‘o le pepa (credit card) na fai ai lana fa’atauga. ‘Ona ia fa’afeso’ota’iina loa lea ‘o se tagata ‘e fesoasoani ‘iā e ia, ma logoina ai loa ‘e lea tagata le polokalame ‘o le ‘Ōfisa ‘o Sulufa’iga mō Matā’upu ‘i ‘Inisiua ma ‘Au’aunga tau tupe. Na tā’ua ‘e lea tagata, ‘o le credit card po’o le pepa ‘e fai ai fa’atauga fa’a’aitālafu, na māfua ai ‘ona telē le ‘aitālāfu ‘a le tinā.
Na’o le pusa’aisa lava na mana’o ‘e fa’a’aitālāfu, mā ‘e le’i mana’o fo’i ‘i se credit card. Na tu’ufa’atasi le pepa mō fa’atauga fa’a’aitālāfu ma lana nonōgātupe, ma tigaina ai ‘e totogi se ‘aitālāfu ‘e silia ma le $10,000. Na tā’ua ‘e Karen Stevens ‘o le ‘ōfisa ‘o sulufa’iga, ‘o se fa’afitauli ‘o lo’o ta’atele mā ‘e iai nisi taimi ‘e fa’asufi ai tagata ‘e fai ni ‘aitālāfu ‘e lē fetaui ma ‘i lātou. Na toe ofo atu le pisinisi na tu’uina atu le pepa fa’a’aitālāfu ‘i le tinā ‘e toe fa’afoi tupe na totogi mō tului ma isi tau ‘e lē gata mō le card ‘ae fa’apea ai ma le nonōgātupe. Na’o le tupe lava na fa’atau ai le pusa’aisa ‘e na te totogiina, lea sa tā’ua ‘e le tinā, ‘e na’o le ta’i $20 ‘e mafai ‘ona ia togitogi ‘i le vāiaso. Na fa’aalia ‘e Stevens, ‘a iai ni tagata ‘e manatu ‘ua tu’uina atu ni nonōgātupe ‘e lē fetaui ma ‘i lātou, ‘e tatau ‘ona fa’aseā muamua ‘i le vāega ‘o lo’o ofoina atu ia ‘aitālāfu.
Link to RNZ (Article) translated by Savelina Kasiano: https://www.rnz.co.nz/news/business/524174/how-a-920-fridge-created-a-10k-debt-spiral
ATA: Sāmoa Capital Radio (file).