Popōlega ‘i le lē toe maua ‘o ata mai mea pu’eata

‘E iai popōlega ma ātugaluga ‘ua fa’alaua’itele mai, ‘e uiga ‘i le lē toe maua ‘e leoleo fa’apea ai ma pūlega ‘o nu u ma itūmālō, ‘o le avanoa ‘e fa’aaogā ai mea pu’eata ‘e silia atu ‘i le afe le aofa’i ‘o lo’o fa’apipi’i solo ‘i luga ‘o auala tetele ‘o Niu Sila.

‘O se līpoti mai le pūlega ‘o ‘auala tetele, le Waka Kotahi, na tā’ua ai, ‘o lo’o lauliliuina nei ‘e lea fa’alāpotopotoga le fa’aaogāina ‘o fa’amatalaga mai ā lātou meapu’eata nei, ‘ona ‘o tūlaga ‘e a’afia ai le Tūlāfono mō le puipuiga ‘o fa’amatalaga tōtino ‘o tagata.

Peita’i, ‘e le’i faia ‘i le taimi nei se fa’ai’uga mautū ‘o lea vāega..’ae ‘o lo’o mana’omia ‘e le pūlega ni manatu ma ni lagona fa’aalia ‘o tagata ‘e tusa ‘o lenei matā’upu.

Na fa’ailoa mai ‘e le pulenu’u  Rotorua ‘o Tania Tapsell, ‘o lenei tūlaga ‘e lē talafeagai, ma fa’aalia ai lona mana’o ‘ina ‘ia ‘aua le a’afia Rotorua ‘i lenei fa’ai’uga ‘a le mālō…..’ā lēai ‘e tatau ‘ona fesoasoani atu le mālō ‘i le pūlega ‘o Rotorua ‘i le totogiina ‘o le tupe ‘e tusa ma le $675,000 afe tālā ‘e mana’omia ‘e tasui ai meapu’eata ‘e 19 ‘o l’oo lātou fa’aaogāina mō le puipuga ‘o le saogalēmū ‘o ona tagata.

Na fa’aalia mai fo’i ‘e se sui ‘o le pūlega ‘o le ‘a’ai ‘o Rotorua, ‘o Don Paterson, ‘o le popōlega tele ‘o lo’o iai, ‘ona ‘o le āfāina ai ‘o su’esu’ega ‘a leoleo, ‘aemaise ‘o fuafuaga tau le saogalēmū ‘o tagata ‘e o’o lava fo’i ‘i matā’upu tau inisiua, pe ‘ā fai ‘o le ‘ā lē toe avanoa meapu’eata nei mō a lātou gāluega ‘e pei ‘ona sau ai ‘i le ‘āmataga.

ATA: Rotorua mayor Tania Tapsell at a July meeting & Rotorua Lakes councillor Don Paterson is concerned about councils losing access to NZTA CCTV cameras. LDR / Laura Smith – RNZ.