Popole le iuni ‘a fuimū ‘i fa’alētonu ‘o ta’avale tineimū

‘Ua fa’ailoa ‘e le iuni ‘a tagata faigāluega ‘i ta’avale fuimū, ni o lātou popōlega ‘e uiga ‘i le tūlaga fa’alētonu ‘o iai ta’avale fuimū ma isi meafaigāluega fa’apitoa, ‘ona ‘e iai lo lātou manatu, ‘e lamatia atu ai ma soifua ‘o le ‘aufaigāluega fa’apea fo’i ma le atunu’u lautele.

‘Ua tele lava līpoti ‘o ta’avale fuimū ‘e leaga pē fa’alētonu ‘i nai māsina ‘ua tuana’i atu pei ‘ona fa’aalia ‘e le New Zealand Professional Firefighters Union.  Na fa’aalia ‘e le sui peresetene ‘o le iuni Martin Campbell ‘e iai se ta’avale fuimū mai le ‘ōfisa ‘i Avondale na leaga ‘a’o fa’atino le gāluega, ma sā fa’atalitali se’i avanoa se ta’avale ‘e sui atu.  ‘E fa’afā fo’i ‘ona leaga le ta’avale fui mū lea na sui atu ‘i le vaiaso talu ai.  ‘E le’i lava fo’i ta’avale ‘e sui atu, ‘i taimi ia ‘e ‘ave ai ta’avale fuimū ‘e fa’aleleia ma toe fa’afou. 

‘E tusa ma le fitu ta’avale na sui atu mō se taimi lē tūmau, ‘o lo’o ‘i se tūlaga lē lelei ‘āto’atoa, ‘e le’i lava fo’i ta’avale ‘e fesoasoani ‘i aso ta’itasi mō gāluega.  ‘Ua vala’au le iuni ‘i le FENZ po’o le ‘Au’aunaga mō afi ma fa’alavelave fa’afuase’i, ‘ina ‘ia vave faia se fofō ‘i le fa’afītāuli.

Link to RNZ (Article) translated by Savelina Kasiano: https://www.rnz.co.nz/news/national/538748/firefighters-union-seriously-concerned-as-firetruck-fleet-faults-continue

ATA: LDR / Ashburton Guardian