Popole fa’alāpotopotoga ‘a fōma’i ‘i le fa’atupega ‘o vaping kits, ‘o se vāega ‘o le fuafuaga ‘o le Smokefree 2025

‘Ua fa’aleo le popōlega ‘o se fa’alāpotopotoga ‘o fai ma sui ‘o fōma’i, ‘ona ‘o se fa’ai’uga ‘a sui ‘o le Soifua Mālōlōina ‘e fa’atupeina ai vaping kits, ‘ona ‘o a’afiaga ‘i le soifua mālōlōina. 

Na fa’asilasila ‘e le mālō ‘i le aso ‘a’o lumana’i le Tausaga Fou, ‘o le ‘ā ‘āmata ‘ona tu’uina atu vaping kits ‘i ‘au’aunaga ‘o gālulue ‘e tāofi le ulaula tapa’a, ‘e fesoasoani ai ‘i tagata ‘ina ‘ia tāofi le ulaula, ‘o se vāega ‘o le fuafuaga ‘o le Smokefree 2025.

Na fa’aalia ‘e le Minisitā lagolago ‘o le Soifua Mālōlōina, Casey Costello, ‘ua faia lea gāioiga, ‘ina ‘ia mafai ‘ona tu’uina atu ‘i tagata ulaula nisi meafaigāluega ‘e fesoasoani ‘e tu’u ai le ulaula tapa’a.

‘O le ‘ā maua ‘e tagata se masini vape, fa’atasi ai ma ni nicotine pods mō le māsina ‘ātoa, ‘i totonu ‘o le tolu māsina, ‘ae ‘o le ‘ā mulimuli ai pea ma le lagolago mai ‘au’aunaga ia ‘o le ‘ā fa’atautaia lea gāluega.  ‘E fa’afāina le maualuga atu ‘o le avanoa ‘o le tāofia ‘o le ulaula tapa’a mō tagata ‘e fa’aaogāina ‘au’aunaga ‘e fesoasoani ‘e tu’u ai le ulaula, ma ‘ua fa’aalia fo’i ‘e le sui minisitā, ‘o lenei fuafuaga, ‘o le ‘ā maua ai le ‘au’aunaga ‘ua iai ma nisi meafaigāluega. 

Peita’i ‘o le popōlega ‘o fōma’i Niu Sila, ‘ua fa’atupeina ‘e le mālō ni ‘oloa ‘e aunoa ma ni su’esu’ega se tele ‘e maua ai ni mau ma ni fa’amaoniga, ‘e mafai ‘ona fesoasoani nei meafaigāluega ‘i tagata, ‘ina ‘ia tāofia ai la lātou ulaula.  ‘O sā’ili’iliga ia na faia, na māua ai, ‘e laitiiti se tūlaga manuia ‘o polokalame vaping ‘e tu’u ai le ulaula.  ‘E na’o le 16 pasene ‘o tagata na lē toe ulaula ‘ina ‘ua ‘uma ‘ona ‘āuai ‘i le polokalame.

Link to RNZ (Article) translated by Savelina Kasiano: https://www.rnz.co.nz/news/national/539515/gp-organisation-concerned-about-funded-vaping-kits-part-of-smokefree-2025-plan

Casey Costello-ATA: RNZ / Samuel Rillstone